Европалик аёл биринчи марта халқаро космик станция қўмондони бўлади

Европалик астронавт Саманта Кристофоретти Халқаро космик станциядаги (ХКС) биринчи аёл қўмондон бўлади, деб ёзмоқда Tengrinews.

Кристофоретти ХКСда 68-экспедицияни бошқаради ҳамда 2022 йилда SpaceX компаниясининг Crew Dragon кемасида NASA астронавтлари Челл Линдгрен ва Боб Хайнс билан бирга парвоз қилади. Маълумотларга кўра, бу Кристофореттининг ХКСга иккинчи парвози бўлади.

«Европа номидан ХКСга қайтиш мен учун шараф. Мен қўмондонлик тайинловини фахр билан қабул қиламан ҳамда космосда ва Ерда тўпланган тажрибани жуда истеъдодли жамоа бошчилигида орбитада қўллаш имкониятини кутяпман», — деб иқтибос келтирди Европа космик агентлиги (ЙКА) Кристофореттининг сўзларидан.

ЙКАнинг маълумотларига кўра, Кристофоретти ХКСнинг бешинчи европалик қўмондонига айланди. Аввал ҳам аёллар ХКСнинг қўмондонлари бўлган. Экипажни турли вақтларда америкалик Сунита Уиллямс ва Шеннон Уокер бошқарган. Шунингдек, америкалик Пегги Уитсон икки марта ХКСдаги экспедицияга қўмондон бўлган.

Аввалроқ Бирлашган Араб Амирликларининг бош вазири Муҳаммад бин Рашид ал-Мактум мамлакатнинг биринчи аёл космонавти Нура ал-Матруший бўлишини маълум қилган эди. «Икки нафар янги космонавтларнинг бири аёл киши эканини маълум қиламиз. Нура ал-Матруший ва Муҳаммад ал-Муллани табриклайман», — деган бош вазир ўзининг ижтимоий тармоқдаги блогида.