Ўзбек миллий академик драма театри актрисаси Маҳфуза Боботиллаева “Омон-омон” кўрсатувига берган интервьюсида оғир жарроҳлик амалиётини бошдан кечиргани ҳақида сўзлаб берди.
“Операцияга киришдан аввал йиғламадим. Демак, шундай бўлиши керак экан, тақдирда бор экан деб ўйладим. Лекин бу осонликча бўлгани йўқ. Операцияга бир ой тайёрлашди. Жарроҳлик амалиёти тугаганидан сўнг шифокорлар ўз қўллари билан реанимациядан кўтариб олиб чиқишди. Кўзимни очсам, ҳамма менга қараб турибди. “Маҳфуза опа, нима хоҳлайсиз?”, деб сўрашди.
Улар шу орқали миям қай даражада ишлаётганини билишмоқчи бўлишди. Мен ҳам тарвуз хоҳлашимни айтдим. Тезгина тарвуз олиб келиб беришди. Тарвузни шундай шимибманки, ҳаётни шимаётгандек. Шу дамда ҳаёт нақадар тотли, нақадар гўзал эканлигини ҳис этдим.
Ҳеч нарса муҳим эмас. Муҳими сиз тириксиз ва соғсиз”,— дейди актриса.
Актриса суҳбат давомида оғир кунида уни ёлғиз қолдирмай, йўқлаб турган ҳамкасбларига ҳам миннатдорчилик билдирди.
“Касалхонада ётганимда ҳамкасбларим тинмай йўқлаб туришди. Шифокорларнинг мумкинмас, дейишга қарамай, Гавҳар Зокирова, Сайёра Юнусова, Саида Умарова, Зилола Ғуломовалар кечаси сёмкадан кейин қандайдир қилиб палатамга киришади.
Актёрларимиз операция куни, операциядан кейин машинаси билан касалхона дарвозаси олдида туришибди. Бирданига нимадир керак бўлиб қолса, олиб келиб берайлик деб. Соғайиб театрга ишга чиққанимдан сўнг уларнинг барчасига ўз миннатдорчилигимни билдирдим”, — дейди Маҳфуза Боботиллаева.
Изоҳ (0)