Германия Марказий Осиё ва Афғонистонда иқлим ва хавфсизлик соҳаларидаги ташаббус бўлган «Яшил Марказий Осиё» лойиҳасини бошлади. Лойиҳанинг ишга туширилиши 28 январь куни Германиянинг Берлин шаҳридаги конференцияда бўлиб ўтди. Унда Ўзбекистон ташқи ишлар вазири Абдулазиз Комилов иштирок этди. Бу ҳақда «Gazeta.uz» хабар берди.
Қайд этилишича, ушбу ташаббус кейинги тўрт йил ичида олтита иштирокчи давлат ўртасида маълумотлардан кенг фойдаланиш ва академик ҳамкорликни ривожлантиришга қаратилган. «Яшил Марказий Осиё» лойиҳаси 2019 йилнинг июнь ойида қабул қилинган Европа Иттифоқининг Марказий Осиё бўйича янги стратегиясини амалга оширишга ўз ҳиссасини қўшади.
Анжуманда Европа Иттифоқининг ташқи ишлар ва хавфсизлик сиёсати бўйича Олий вакили Хосеп Боррел, Германия, Ўзбекистон, Қозоғистон, Қирғизистон, Тожикистон ва Туркманистон ташқи ишлар вазирлари, шунингдек Афғонистон ташқи ишлар вазирининг ўринбосари иштирок этди.
Ўзбекистон делегацияси раҳбари Абдулазиз Комилов ўз нутқида Марказий Осиё мамлакатлари учун глобал иқлим ўзгариши билан боғлиқ мавжуд ва эҳтимолий таҳдидлар, шунингдек чекланган сув ресурсларидан оқилона фойдаланиш, энергия тежайдиган ва экологик технологияларни жорий этиш бўйича мамлакатда кўрилаётган чоралар ҳақида гапирди.
Хосеп Боррелнинг таъкидлашича, Европа Иттифоқи 2050 йилга қадар Европани иқлим жиҳатдан биринчи нейтрал қитъасига айлантириш мажбуриятини олган. Бундай мажбурият иқтисодий ўсишнинг янги стратегияси бўлган «Европа яшил курси»ни эълон қилиш орқали олинган. Мазкур стратегия одам табиатга ундан олаётган нарсасидан кўпроқ нарсани қайтаришини назарда тутади.
«Бугунги кунда дунё бўйича ишлаб чиқарилаётган углерод газларининг 9 фоизи Европа Иттифоқи ҳиссасини ташкил қилади ва бу кўрсаткич камаймоқда. Шу билан бирга, Европа Иттифоқига аъзо бўлмаган 20 та мамлакат (G20) мазкур газларнинг 70 фоизини ишлаб чиқармоқда ва бу рақам ўсиб бормоқда. Шунинг учун ҳамжиҳатлик зарур», — деб таъкидлаган Хосеп Боррел.
Хосеп Боррел иқлим ўзгариши Марказий Осиёга жиддий таъсир кўрсатганини таъкидлади. «Сўнгги 30 йил ичида ҳарорат кескин кўтарилди. Қурғоқчилик ва сувнинг етишмаслиги бутун экотизимни йўқ қилди. Музликлар қисқариши сув оқимлари камайишига олиб келди, бу эса сув ресурслари учун рақобатни кучайтириши мумкин», — деди у.
У Орол денгизи сатҳининг пасайишини «нафақат экологик муаммо», балки унинг аввалги қирғоқларида яшовчи одамлар учун «ҳалокат» деб атади.
Боррелнинг маълум қилишича, Европа Иттифоқи жорий йил охирида янги лойиҳани ишга туширишни режалаштирмоқда. Лойиҳанинг мақсади Фарғона водийсидаги хавфсизликни таъминлаш учун Ўзбекистон, Қирғизистон ва Тожикистоннинг иқлим ўзгаришларига қарши кураш бўйича имкониятларини кучайтириш ҳисобланади.
«Европа Иттифоқи уран қазиб олиш мероси билан боғлиқ жиддий муаммоларни ҳал қилиш масаласи билан жуда фаол шуғулланмоқда. Иқлим ўзгариши сабабли тошқинлар ва кўчкилар тобора кўпайиб бормоқда. Агар ҳеч нарса қилинмаса, улар урандан қолган объектларидан токсик ва радиоактив чиқиндиларни минтақанинг трансчегаравий дарёларига ҳалокатли тарзда тарқалишига олиб келади. Бу ўта жиддий табиий офатларга олиб келиши мумкин», — деди Европа Иттифоқи дипломатияси раҳбари.
Германия ташқи ишлар вазири Хайко Маас ўз нутқида «агар иқлим ўзгариши чегара билмаса, унда бизнинг жавобимиз ҳам чегараларни билмаслиги керак» деган: « ‘Менинг мамлакатим устувор’ деган ёндашув билан биз узоққа бормаймиз. Охир оқибат, бу ҳамма нарса ҳаммага қарши эканлигини англатади».
Анжуман якунида расмий делегациялар раҳбарлари қўшма декларацияни имзолади.
Изоҳ (0)