Ўзбекистон президенти 24 июль куни 68 ёшни қарши олди. Давлат раҳбари матбуот котиби шу муносабат билан хорижий давлатлар, ҳукуматлар, парламентлар, нуфузли халқаро ташкилотлар, етакчи хорижий компаниялар раҳбарлари, таниқли жамоат, дин ва спорт арбоблари, мамлакатнинг барча ҳудудлари ва хориждаги фуқаролардан қутловлар келаётганини билдирди.
“Мактубларда Ўзбекистон президенти раҳбарлигида аҳоли фаровонлигини ошириш, мамлакат барқарорлиги ва изчил тараққиётини таъминлаш, унинг халқаро нуфузини мустаҳкамлашга қаратилган ортга қайтмас сиёсий ислоҳотлар ва ижтимоий-иқтисодий янгиланишлар дастурини самарали амалга ошириш борасида эришилган юксак натижалар қайд этилган.
Президентимизга мустаҳкам соғлик ва масъулиятли давлатчилик фаолиятида янги муваффақиятлар, Ўзбекистоннинг кўп миллатли халқига эса тинчлик-осойишталик, фаровонлик ва равнақ тилаклари изҳор этилган”, деди Шерзод Асадов.
Унинг қайд этишича, 24 июлда давлат раҳбарининг кўплаб мамлакатлар етакчилари билан телефон орқали мулоқотлари режалаштирилган.
Ўзбекистон президенти 68 ёшни қарши олди
Шавкат Мирзиёев 1957 йил 24 июлда Жиззах вилоятининг Зомин туманида шифокор оиласида туғилган. 1981 йили Тошкент ирригация ва қишлоқ хўжалигини механизациялаш муҳандислари институтини тугатган.
У 2003 йилда Ўзбекистон бош вазири этиб тасдиқланиб, 2016 йилга қадар фаолият юритган. 2016 йил 4 декабрь куни бўлиб ўтган президент сайлови якунлари бўйича сайловчиларнинг 88,61 фоиз овози билан Ўзбекистон президенти этиб сайланган. 2021 йил 24 октябрь куни бўлиб ўтган президент сайловида 80,1 фоиз овоз билан 7 йил муддатга Ўзбекистон президенти этиб қайта сайланган. 2023 йил 9 июлида бўлиб ўтган сайловда эса Шавкат Мирзиёев 87,05 фоиз овоз олиб, ғолиб бўлганди. 14 июлда тантанали қасамёд қилиб, ўз лавозимига киришди. У “Меҳнат шуҳрати” ва “Фидокорона хизматлари учун” орденлари билан тақдирланган.
Изоҳ (0)