Самарқанд халқаро иқлим форуми доирасида Ўзбекистонда “яшил иқтисодиёт”ни ривожлантиришга қаратилган қатор ҳужжатлар имзоланди. Бу ҳақда Инвестициялар, саноат ва савдо вазирлиги хабар берди.
Маълум қилинишича, ISSV ва SANY Renewables International Investment Co., Ltd. ўртасида Қорақалпоғистон Республикасида 1000 МВт қувватга эга шамол электр станцияси қурилади.
Шунингдек, Хитойнинг Liquip International компанияси Жиззах вилоятининг Фориш туманида 500 МВт қувватга эга қуёш электр станциясини қурилиши кутилмоқда.
2024 йилнинг декабрь ойида Ўзбекистон Жаҳон банки гуруҳи кўмагида Хоразм вилоятида янги қуёш электр станциясини ишга тушириши ҳақида хабар берилганди.
Хоразм вилоятидаги янги қуёш электр станцияси
2024 йилнинг февралида Шавкат Мирзиёевнинг Хоразм вилоятига ташрифи чоғида Тупроққалъа туманида Voltalia компанияси томонидан қуввати 100 мегаваттлик қуёш электр станцияси қурилишини бошлаш маросими бўлиб ўтганди. Бу Хоразмдаги илк шундай йирик лойиҳадир. Бу лойиҳа ишга тушса, Хоразм вилоятида электр энергияси ишлаб чиқариш қувватлари 30 фоизга ошиб, 424 мегаваттга етади. Хусусан, Тупроққалъа туманининг электрга бўлган йиллик 135 миллион киловатт соат талаби тўлиқ қондирилади.
Франциянинг Voltalia компанияси қайта тикланувчи энергетика соҳасидаги иншоотларни қуришда бой тажрибага эга. Ҳозирда дунёнинг 20 мамлакатида умумий қиймати 10 миллиард доллардан зиёд инвестиция лойиҳаларини амалга оширмоқда.
Изоҳ (0)