Олий Мажлис Қонунчилик палатасининг 17 декабрдаги мажлисида озодликдан маҳрум этилган шахсларнинг масофали видеоучрашувга бўлган ҳуқуқини таъминлашга қаратилган қонун лойиҳаси биринчи ўқишда кўриб чиқилиб, қабул қилинди.
Мажлис қайд этилишича, ушбу қонун лойиҳаси замонавий ахборот-коммуникация технологияларини татбиқ этиш орқали уларни жамиятдан узилиб қолмаслигини таъминлаш, жазони ўтаб чиққанидан сўнг жамиятга қайта мослашишига кўмаклашиш мақсадида ишлаб чиқилган.
Қонун лойиҳаси билан Жиноят-ижроия кодексининг тегишли моддаларига Ички ишлар вазирлиги тасарруфидаги барча жазони ижро этиш муассасаларида жазо муддатини ўтаётган маҳкумларга масофадан видеоучрашув ҳуқуқини бериш орқали ўз яқинлари билан онлайн учрашиш имкониятини яратишни назарда тутувчи ўзгартириш ва қўшимчалар киритилмоқда. Бунда масофали видеоучрашув сони жазони ўташ тартиботига қараб белгиланади.
Лойиҳада манзил-колониялар ҳамда тарбия колонияларидаги маҳкумларнинг йил мобайнида йигирма тўрт марта масофали видеоучрашувлар олиш ҳуқуқига эга эканлиги белгиланмоқда.
“Бугунги кунда амалда ҳам телефон ва видео-учрашувлар ташкил этиб келинади. Видео-учрашув учун маҳкумнинг оила аъзолари ўз ҳудудидаги муассасамизга бориши керак. Эндиликда онлайн платформа орқали амалга ошириш имконига эга бўламиз. Ҳозирда бундай платформадан 45 таси муассасаларимизга ўрнатилган. Қонун қабул қилинганидан сўнг улар сони 150 тага етказилади. Ушбу махсус онлайн дастур маҳкумнинг яқинларининг телефон рақамларига улаб берилади”, дея қайд этди мутасаддилар мажлисда.
Қонун ташаббускорларининг фикрича лойиҳадаги мазкур ўзгартиришлар жазони ижро этиш муассасаларида жазо муддатини ўтаётган маҳкумларнинг масофали видеоучрашув йўли билан оила аъзолари ва яқинлари билан доимий алоқаларини таъминлаш ва оилавий муносабатларини сақлаб қолишга, шунингдек, тузалиш йўлига ўтишига кўмаклашишга хизмат қилади.
Жазони ижро этиш муассасаларида маҳкумлар билан видеоконференс орқали 15 дақиқагача қисқа муддатли учрашувлар ўтказишга рухсат берилиши ҳақида 2021 йилда маълум қилинганди.
Жазони ижро этиш бош бошқармаси Тарбиявий ва ижтимоий психологик ишларни ташкил этиш бошқармаси бошлиғи, подполковник Жамшид Султонов жазони ижро этиш муассасаларида жазони ижро этаётган маҳкумлар билан видеоконференсалоқа орқали қисқа муддатли учрашувларни ўтказиш тартиби ишлаб чиқилганини, бу тизим тест режимида ишлаётганини айтганди.
Амалдаги қонунчиликка кўра, учрашувлар ўртада тўсиқ бўлган ҳолда ташкил қилинади. Шунинг учун бу қўшимча чиқимларни олдини олиш, қариндошларини йўлкира харажатларидан озод қилиш мақсадида амалга ошириш кўзда тутилган.
Бундан аввал президент томонидан 4 декабрда имзоланган қонун билан Жиноят-процессуал кодексига қўшимчалар ва ўзгартириш киритилганди. Қонунда озодликдан маҳрум этилган шахсларни улар жазо ўташини давом эттириш учун, шунингдек, руҳий касалликка чалинган шахсларни мажбурий даволаш учун бериш ва қабул қилиш асослари, шартлари ҳамда рад этиш тўғрисидаги қоидаларни киритиш назарда тутилган.
2025 йил 1 январдан бошлаб уй қамоғи эҳтиёт чораси қўлланилган ҳамда озодликни чеклаш жазоси тайинланган шахсларнинг эҳтиёт чораси ва жазони ижро этиш жойида бўлишини реал вақт режимида масофадан туриб назорат қилиш тартиби амалиётга босқичма-босқич жорий этилади.
Изоҳ (0)