АҚШ тижорат компаниялари Ўзбекистон бозорига киришга интилмоқда. Бу ҳақда АҚШ Давлат департаменти матбуот хизмати берган маълумотга асосланиб, “Тренд” нашри хабар берди.
Манбада айтилишича, АҚШ тижорат компаниялари етакчилари Ўзбекистон билан ҳамкорлик қилиш борасида кўп бор Давлат департаментининг савдо бўлимига мурожаат қилган. Мурожаатлардан мақсад эса ўсиб бораётган бозорга маблағ киритиш ва манфаатли ҳамкорликка эришиш бўлган.
“Маҳсулотларимиз ҳам Ўзбекистонга олиб кириш учун текшириш ва сертификатлашни талаб қилади, шунинг учун бу жараённи тезлаштириш АҚШ қишлоқ хўжалиги ва чорвачилик маҳсулотларини ўзбекистонлик истеъмолчиларга етказишда ёрдам беради. АҚШ технологиялари, саноат ускуналари ва ишлаб чиқарилган маҳсулотлар етказиб берувчилари ҳам давлат харидлари имкониятлари бўйича фаол иштирок этмоқда. Ўзбекистондаги ҳамкорлар билан ишлашга қизиқиш катта”, дейилган департамент матбуот котиби хабарида.
Матбуот котибининг сўзларига кўра, АҚШ Ўзбекистонга эълон қилинган ислоҳотлар дастурини амалга оширишда, жумладан, иқтисодий масалаларда ҳам ёрдам беришга тайёр. Охирги иқтисодий ислоҳотлар сармоявий муҳитни сезиларли даражада яхшилаган ва кейинги ислоҳотлар Ўзбекистонга кўпроқ сармоявий ва техникавий тажриба олиб келиши мумкин.
“Умуман олганда, биз Марказий Осиё ва Жанубий Кавказ ҳукуматлари ғарбга — Европа томон минтақавий алоқаларни қўллаб-қувватлаш бўйича олиб бораётган кўп томонлама саъй-ҳаракатларни олқишлаймиз ва рағбатлантирамиз. Бундай саъй-ҳаракатлар янада хавфсиз, барқарор ва фаровон минтақани яратишга ёрдам беради”, дейилади АҚШ идораси баёнотида.
Хабарда айтилишича, АҚШ компаниялари Ўзбекистонда инфратузилмага инвестиция киритиш борасида ҳам ўрганишлар олиб бормоқда. Таҳлиллар ўзини оқласа стратегик лойиҳаларга қўл урилиши билдирилган.
“Глобал инфратузилма бўйича ҳамкорлик орқали АҚШ ҳозирда ТрансКаспий халқаро транспорт йўналишидаги стратегик лойиҳаларни сезиларли даражада олдинга силжитиш учун лойиҳаларга техник ёрдам кўрсатиш, лойиҳаларни тайёрлаш ва молиялаштиришга ҳисса қўшиши мумкин бўлган инфратузилма инвестициялари учун потенциал соҳаларни баҳоламоқда”, дейилган расмий манбада.
Аввалроқ Ўзбекистон транспорт вазири ўринбосари Жасурбек Чориев Глобал инфратузилма ва инвестициялар соҳасидаги ҳамкорлик бўйича махсус координатор вазифасини бажарувчи Хелайна Матза билан ТрансКаспий халқаро транспорт йўналишини ривожлантиришга қаратилган инфратузилма лойиҳаларини молиялаштириш масалаларини муҳокама қилиш учун учрашув ўтказган эди. Унда томонлар жумладан Ўзбекистон ҳудудларида мултимодал логистика марказлари ва А тоифали омборларни ривожлантириш, айрим темирйўл вокзалларининг сиғимини ошириш масалаларини ҳам гаплашиб олган.
Изоҳ (0)