Япония бош вазири Фумио Кисида сентябрь ойида истеъфога чиқишини маълум қилди. Бу ҳақда вазирнинг 14 август куни чиқарган баёнотига асосланиб. Reuters хабар берган.
Манбада айтилишича, Японияда сўнгги пайтларда Кисида фаолияти билан боғлиқ сиёсий жанжаллар кучайиб кетган. Сўнгги уч йилдаги юқори инфлация ва иқтисодий муаммоларга қарши курашишда мамлакат раҳбариятида ирода етишмаслиги мамлакат аҳолиси томонидан кўплаб намойишлар ташкил этилишига олиб келган.
Бош вазирни вазифасини тарк этишга олиб келган асосий масала бу нархлар ошиши бўлган. Сўнгги 6 ойда яшаш харажатлари, озиқ-овқат ва коммунал тўловлар қиймати ноодатий тарзда ошиб кетган. Ҳукуматнинг тезкор иқтисодий қарорлари нархлар сиёсатига амалда ҳеч қандай таъсир эта олмаган.
“Сиёсат жамоатчилик ишончисиз ишламайди. Менга бўлган ишонч қолмаган экан давом этишимдан ҳам маъно йўқ. Эндиликда мен фаолиятимни янги сайланган ЛДП (Либерал-демократик партия) раҳбарини қўллаб-қувватлашга қаратаман”, деган Фумио Кисида ўз истеъфосига муносабат билдириб.
Бош вазирнинг жамоатчилик ишончини йўқотишига таъсир этган бошқа омиллар ҳам мавжуд. Кисиданинг ЛДП партияси “Бирлашув” христиан черкови билан алоқаларга эга эканлиги аниқланган. Бундан ташқари сайлов кампаниясида партия черковдан ва бир қанча номаълум манбалардан маблағлар олган. Бу эса аҳоли орасида саволларни келтириб чиқарган.
Кисиданинг “вориси” эндиликда дунёдаги тўртинчи йирик иқтисодиётни изга солиш учун қаттиқ курашишга тўғри келиши мумкин. Чунки нархлар нотабиий тарзда ошмоқда. Ҳукумат бу соҳани назорат қилиш қобилиятини тўла йўқотган. Бозорни барқарорлаштириш учун ажратилаётган дотацияларни улкан иқтисодиёт ютиб юбормоқда.
Янги бош вазир шунингдек, Япониядаги тарқоқ ва радикал элитани бирлаштириши, иқтисодий муаммоларни бартараф этиши шарт. Бу вазифалар устига Хитойнинг геосиёсий таҳдидларига қарши туриш ва АҚШдаги ҳукумат ўзгаришига мослашиш шартлари ҳам қўшилади.
Изоҳ (0)