Афғонистоннинг Ҳилманд вилоятида 45 ёшли эркак етти яшар қизга уйланди. Куёвнинг аллақачон иккита хотини борлиги айтилмоқда. Бу ҳақда Tolo News хабар берди.
Тўй маросими Маржа туманида бўлиб ўтган, боланинг отаси пул эвазига никоҳга рози бўлган. “Толибон” вазиятдан хабар топгач, жараённи вақтинча тўхтатган. Иккала эркак ҳам қисқа муддатга ҳибсга олинган, аммо жиноий жавобгарликка тортилмаган.
“Толибон” эркакка қизни уйга олиб кетишдан олдин 9 ёшга тўлишини кутишни буюрган, дейди манбалар.
Маросимдан олинган суратларда эркакнинг ёш қиз ёнида кўрингани акс этган. Бу ҳуқуқ ҳимоячилари орасида норозилик уйғотган. Уларнинг айтишича, бу ҳолат Афғонистон жанубида, хусусан, Ҳилманд, Қандаҳор ва Зобул каби “Толибон” кучли назорат ўрнатган вилоятларда болалар никоҳи кўпайишини акс эттиради.
“Толибон”нинг Эзгуликни тарғиб қилиш ва иллатларнинг олдини олиш вазирлиги ҳолатни ўрганаётганини таъкидлади.
Бир неча кун олдин Ҳилмандда етти ёшли қиз 45 ёшли эркакка турмушга чиқди. Иш вазирликнинг Ҳилманд идорасига етказилгач, зудлик билан қизнинг отаси ва ҳуқуқбузар чақиртирилиб, иш судга оширилган. Яна бир бор таъкидлаймизки, ислом тамойилларига зид бўлган вояга етмаганлар никоҳи қабул қилиниши мумкин эмас ва вазирлигимиз аёллар ҳуқуқларини қўллаб-қувватлайди, деган вазирлик матбуот котиби Саиф-ул-Ислом Хайбер.
Изоҳ (0)