“Электр ва газ истеъмоли лимитдан 20 фоизгача ошиб кетса ҳам базавий тариф сақланиб қолади” — президент

Эндиликда саноат корхоналари электр ва газ истеъмоли лимитдан 20 фоизгача ошиб кетса ҳам базавий нарх ўзгармайди. Бу ҳақда 20 август куни президент ва тадбиркорлар учрашувида маълум қилинди.

Қайд этилишича, барча саноат корхоналари электр ва газга ўрнатилган лимит ошиб кетса, тўлов икки карра кўп ундирилаётганидан норози бўлмоқда.

“Саноатимизнинг ўсишига таъсир қиладиган бундай чекловлар қисқартирилиши белгиланди. Энди электр ва газ истеъмоли лимитдан 20 фоизгача ошиб кетса ҳам базавий тариф сақланиб қолади. Агар истеъмол 20 фоиздан ўтиб кетса, ошган қисмига тўлов 20 фоиз қимматлашади”, деган президент Шавкат Мирзиёев.

Мулоқотда тадбиркорлик рейтингида “юқори”, “ўрта” тоифадаги корхоналарга электр учун олдиндан тўловни бир ойда иккига бўлиб тўлашга рухсат берилиши таъкидланган.

Шу билан бирга, мажлисда бюджетдан ёки кредитдан қарзи бор тадбиркорларни ҳисоб рақамига “инкассо” қўйилгани учун улар электр, газ ва сувга тўлов қила олмаётганига эътибор берилган. Мазкур масала инобатга олиниб, эндиликда “инкассо” бўлганда ҳам коммунал хизматларга тўловлар тўхтатилмаслиги маълум қилинган.