“Интер” жамоаси сардори ва ҳужумчиси Лаутаро Мартинес Клублар ўртасидаги Жаҳон чемпионатининг 1/8 финал босқичида Бразилиянинг “Флуминенсе” клубига 0:2 ҳисобида мағлуб бўлиб, мусобақани тарк этганидан кейин ўз фикрларини билдирди.
Аргентиналик ҳужумчи ким жамоада қолишни истамаса, кетиши кераклигини таъкидлади:
— Биз бор кучимизни ишга солдик. Бутун жамоамиз номидан мухлислардан узр сўрайман. “Интер” доимо ўз олдига катта мақсадлар қўйиб, уларни амалга ошириш учун курашиб келган. Ким клубда қолишни хоҳламаса ва белгиланган талабларимизга жавоб бермаса, кетиши керак. Бугунги ўйинимиздан қониқмадим. Сардор сифатида мен жамоанинг мақсадлари учун курашишни давом эттирмоқчиман. Жамоамиз кучли, биз совринлар ютганмиз ва шу йўлдан боришни истайман. Ким қолишни истаса, қолади. Ким истамаса — хайр.
Шунингдек, у мавсум жуда оғир кечганини айтди:
— Ҳеч ким бу йўлда ёлғиз ҳаракат қилиб, натижага эриша олмайди. Сардор сифатида энг катта масъулият менинг бўйнимда турибди. Бу мағлубият учун мухлислардан кечирим сўрайман. Мавсум жуда узун ва оғир кечди. Энди куч йиғишимиз, жисмоний ҳолатимизни тиклашимиз ва “Интер”ни яна катта совринлар учун тайёрлашимиз керак, — деди Лаутаро Мартинес.
Эслатиб ўтамиз, “Флуминенсе” чорак финалда “Ал-Ҳилол” билан тўқнаш келади.
Изоҳ (0)