Шавкат Мирзиёев Озарбайжон халқининг умуммиллий етакчиси Ҳайдар Алиев хотирасига ҳурмат бажо келтирди, деб хабар бермоқда Президент матбуот хизмати.
У 3 июль, Озарбайжонга давлат ташрифининг иккинчи кунида Боку шаҳрида Фахр хиёбонига ташриф буюрди ва Ҳайдар Алиев қабрига гул қўйди.
-SJC1wLEB.avif)
Президент хабарида таъкидланишича, Ҳайдар Алиев ҳақли равишда мустақил Озарбайжоннинг асосчиси ҳисобланади. Унинг раҳбарлигида мамлакатнинг жадал ривожланиши ва халқаро майдондаги нуфузи юксалиши учун мустаҳкам пойдевор яратилди. Унинг давлат қурилиши ва миллий суверенитетни мустаҳкамлашга қўшган ҳиссаси Озарбайжон тарихида алоҳида ўрин тутади.
Шавкат Мирзиёев шу куни Боку шаҳридаги Ғалаба боғига ҳам ташриф буюрди. Ўзбекистон етакчиси Ғалаба кунига бағишланган ёдгорлик пойига гул қўйиб, Озарбайжон ватанпарварлари хотирасига ҳурмат бажо келтирди.
Озарбайжон пойтахти марказида жойлашган ушбу ёдгорлик мажмуаси мамлакат озодлиги ва ҳудудий яхлитлиги йўлида қурбон бўлган миллий қаҳрамонлар хотирасини абадийлаштириш мақсадида бунёд этилган.
Шавкат Мирзиёевнинг Озарбайжонга давлат ташрифи биринчи куни қандай ўтди?
Ўзбекистон президенти давлат ташрифи билан Боку шаҳрига 2 июль куни келганди. Уни Озарбайжон бош вазирининг биринчи ўринбосари Яқуб Аюбов ва бошқа расмий шахслар кутиб олди. “Загулба” қароргоҳида расмий кутиб олиш маросими бўлди. Сўнг Ўзбекистон ва Озарбайжон президентлари тор доирада учрашув ва Олий давлатлараро кенгашнинг иккинчи йиғилишини ўтказди. Музокараларда икки мамлакат ўртасида Иттифоқчилик муносабатлари тўғрисидаги шартномани кенг кўламда амалга оширишга алоҳида эътибор қаратилди. Музокаралар якунида Шавкат Мирзиёев ва Илҳом Алиев Олий давлатлараро кенгашнинг иккинчи йиғилиши қарорини қабул қилди.
Шу куни Боку шаҳрида “Ўзбекистон” боғига тамал тоши қўйишга бағишланган тантанали маросим бўлиб ўтди. Лойиҳага кўра, 4,5 гектар майдонда Ўзбекистоннинг бой маданияти ва анъаналарини намойиш этадиган улкан мажмуа барпо этилади. Шавкат Мирзиёев ва Илҳом Алиев Ўзбекистоннинг Бокудаги элчихонаси янги биносини очиб берди. Давлат ташрифининг биринчи куни якунида Шавкат Мирзиёев Илҳом Алиев ҳамроҳлигида Sea Breeze дам олиш мажмуаси фаолияти билан танишди.
Изоҳ (0)