“Журналист” сериалидаги роли билан танилган актриса Азиза Ёқубова “Чотки TV” каналига интервью берди. Актриса интервью давомида оиласи, турмуш ўртоғининг хиёнати сабаб қамалиб кетишига оз қолгани ва иккинчи турмушидан ҳам ажрашгани сабаби ҳақида гапирди.
“Эрим ўғлимнинг энагаси билан хиёнат қилди”
Азиза Ёқубова икки маротаба турмуш қурган, унинг биринчи турмушидан бир қизи, иккинчисидан Муҳаммад исмли ўғли бор. Актриса собиқ иккинчи турмуш ўртоғи ва ўғлига ёлланган энага ўртасидаги муносабатлар уни қай аҳволга солгани ҳақида сўзлаб берди.
— Турмуш ўртоғим билан ярашишга жуда кўп ҳаракат қилдим, кўп кечирдим. Кўрмай, билмай, тинч яшай десам ҳам, Аллоҳнинг ўзи эримнинг хиёнатларини менга кўрсатиб қўяверди. Оилани асраб қололмаганликда менинг ҳам айбим кўп. Эрим ухлаб қолганда телефонини текширардим, шундан ҳамма нарсани билиб қолаверардим. Ўғлимга қараши учун ёлланган энага бор, уйимиздаги лифтнинг ойнасидан эримнинг унга қилган ножўя ҳаракатини кўриб қолганман. Шундан кейин уйимга ҳам кузатув камераси ўрнатдим. Бир куни энаганинг телефонини олиб эрим билан ёзишмаларини ўқидим, кийим-кечак дўконим билан овора бўлиб уйда йўқ бўлган вақтларимда, боламнинг кўз ўнгида жуда кўп ишқий саргузаштлар бўлган экан. Яна кўп ёзишмалар бўлган, ҳаммасини ҳам айтолмайман, дейди актриса.
“Қўлимда пичоқ бўлган, қамалиб кетишим мумкин эди”
— Шу воқеаларни билиб қолганимда энагани ўлдириб, қамалиб кетишимга бир бахя қолган. Ўша қизни дўппослаб уриб ташлаганман. Ўша пайтда қўлимда пичоқ бор эди, ақлимни йўқотгандим. Ҳеч нима кўзимга кўринмади, ўлдираман деб турганимда онамнинг бир гапи бор эди, кўп такрорларди, шу ёдимга тушди. “Нима бўлса ҳам ўзингни йўқотиб қўйма, сенга бирор кор-ҳол бўлса, ўзинг қамалиб кетасан, болаларинг етим қолади, эринг шундай аёллардан бирига уйланиб кетади, фарзандларингни ҳам олиб қўяди” дерди. Шу сабабгина ўзимни тўхтатдим, қўлимдаги пичоқ ҳам, шукрки, ўтмас экан. Эримга шунчалик фарқи йўқки, мен энага билан жанжаллашаётганимда у хотиржам бўлиб, кулиб видеога олиб турган экан. Буни сезмаганман, кейин шу видеони кўрсатиб, тарқатиб юбораман дея бир йилгача таҳдид қилиб юрди.
Суратга олиш жараёнларининг бирида қамоқ жазосини ўтаётган аёллар билан гаплашгандим. Айнан қотиллик билан “ўтирган”лари билан гаплашганимда ҳушим ўзимда эмас эди, қандай пичоқ тиқиб қўйганимни, қандай ўлдириб қўйганимни билмайман, дейишарди. Бири эрини, бири кундошини, яна кимдир қайнонасини ёки келинини. Ҳақиқатан ҳам шундай бўларкан, аёллар атайин бундай қилмаслигини ўзим худди шу вазиятга тушиб билдим, дейди Азиза Ёқубова.
“Ажрашмоқчи бўлган аёлларни фикридан қайтаришга ҳаракат қиламан”
— Шу эрим билан тўрт ой никоҳ билан яшадим, қолгани турли гап-сўз, келди-кетди билан ўтган. Ўз уйимда, ўзимнинг пулимга яшардим, фарзандларимни ўзим боққанман. Фарзандларим етим бўлмасин, отасиз улғаймасин дея оиламни сақлаб қолишга кўп рози бўлганман, аммо барибир бўлмади. Instagramъдаги обуначиларим ҳаётимни билгани учун менга кўп ёзишади — ажрашмоқчиман, эрим хиёнат қиляпти, аммо қандай қўлга туширишни билмаяпман, дея. Шунда яшашга уйингиз борми, ажрашгач фарзандингизни боқа оласизми, дея сўрайман. Чунки ажрашиб ота уйига борган қизни барибир ёқтиришмайди, кун келиб ортиқчалик қила бошлайди. Менга ёзган ҳамма аёлларга ҳа, ажрашинг деб кетавермайман. Қайтанга уларни қайтаришга ҳаракат қиламан. Оиласи жар ёқасида турган аёл атрофдагиларнинг, айниқса, дугоналарининг гапига қулоқ солмаслиги керак. “Ана, фалончини қара, ажрашиб маза қилиб яшаяпти. Буни қара, иккинчи хотин бўлиб тегиб олган ёки ўйнаш бўлиб юрибди” дейдиган дугоналар кўп, аммо уларга қулоқ солиб шундай қилиш энг катта хато, дейди Азиза.
Ҳозирда ҳаётимда ҳеч ким йўқ, бир инсон бир йилдан бери мени рози қилишга ҳаракат қилиб келяпти, уни Instagramъдаги обуначиларимга мистер Х дейман. Ҳали у билан ҳеч қандай муносабатим йўқ, аммо кейинчалик нима бўлиши ҳақида аниқ гап айтолмайман, дея ишора қилди актриса.
Изоҳ (0)