Европарламент 19 июль куни Грузия авторитар тизимни ўзгартирмагунча иттифоққа қўшила олмаслигини маълум қилди. Бу ҳақда Civil Georgia хабар берди.
Евроиттифоқнинг таъкидлашича, Грузиянинг ҳамдўстликка қўшилиши мамлакатда “адолатли сайловлар ўтказилгунга қадар” инкор этилади.
“Европарламент Грузиянинг амалдаги ҳукуматини тан олмайди. Бироқ иттифоқ республика халқини қўллаб-қувватлашда давом этади”, дейилади ташкилот баёнотида.
Грузиядаги ички сиёсий вазият ва мамлакатнинг Европа Иттифоқи билан муносабатлари 2024 йил октябрь ойида бўлиб ўтган парламент сайловларидан сўнг кескинлашганди. Сайловда ҳукмрон “Грузия орзуси” партияси 53,93 фоиз овоз билан ғалаба қозонган. Мухолифат эса партияни сохталаштиришда айблаб, сайлов натижаларини тан олишдан бош тортган. Оқибатда мамлакатда кенг қамровли намойишлар бошланиб кетган.
Шу билан, Европа Иттифоқига қўшилиш жараёни тўхтаб қолганди. Transparency International Georgia ҳисоб-китобларига кўра, ўша пайтдаги тартибсизликларда камида 400 киши ҳибсга олинган.
Маълумот учун, Грузия фуқаролари 2017 йилдан бошлаб ЕИ ҳудудига қисқа муддатли саёҳатлар (90-180 кунгача) учун визасиз кириш имконини қўлга киритган. 2022 йилда эса мамлакат итифоққа расмий равишда қўшилиш учун ариза топширган. 2023 йил охирида Грузияга кандидатура мақоми берилган. Бунинг эвазига иттифоқ мамлакатдан 9 та асосий сиёсий ва демократик ислоҳотларни бажаришни талаб қилган. Улар қаторида суд тизими, оммавий ахборот воситалари эркинлиги, коррупцияга қарши кураш, сиёсий қамровчанлик ва ҳоказолар бор эди.
Изоҳ (0)