Чеченистон раҳбари Рамзан Қодировнинг ўғли Адамга республиканинг олий мукофоти — Аҳмад Қодиров ордени берилди. Бу ҳақда миллий сиёсат ва ташқи алоқалар вазири Аҳмад Дудаев хабар берди.
“Бу унинг юксак ахлоқий фазилатлари ва ишга садоқатининг муносиб эътирофидир”, дейди Аҳмад Дудаев.
У Адам Қодировни ватанпарвар деб атади ва “ҳақиқий мусулмон ҳамда чечен бўлиб, ўзининг шонли уруғини муносиб намойиш этаётгани”ни билдирди.
Чеченистондан “Единая Россия” партияси депутати Адам Делимханов ҳам уни табриклаб, “замонавий ёш авлоднинг ёрқин вакилларидан бири” деб таърифлади. Шунингдек, “кўрсатилган ишончни тўлиқ оқлашига, бундан буён ҳам халқ ва республика фаровонлиги йўлида сидқидилдан меҳнат қилишига” ишонч билдирди.
- Орден 2004 йилда Чеченистоннинг биринчи президенти Аҳмад Қодиров хотирасига бағишлаб таъсис этилган. Мукофот “давлатчиликни ривожлантириш, меҳнатдаги ютуқлар, халқлар ўртасидаги тинчлик, дўстлик ва ҳамкорликни мустаҳкамлаш, Чеченистоннинг гуллаб-яшнаши ва шуҳратига ҳисса қўшиш каби алоҳида хизматлари учун атоқли давлат ва жамоат арбоблари, фуқаролар ва ташкилотларга” топширилади.
- Рамзан Қодиров ва унинг 18 ёшли ўғли, республика ёшлар ишлари вазири Аҳмад ҳам мазкур орден билан тақдирланган.
Адам Қодиров 16 ёшда. Ўтган октябрь ойида унга Чеченистон Қаҳрамони унвони берилганди.
Изоҳ (0)