“Толибон” назоратидаги Афғонистоннинг Қандаҳор вилоятида маҳаллий ҳокимият давлат ва хусусий секторда меҳнат қилаётган аёлларга ўзлари билан “маҳрам картаси” олиб юришни мажбурий қилди.
Amu TV хабарига кўра, ҳужжатда аёлнинг шахсий маълумотлари билан бирга унинг эркак “қўриқчиси” (ота, ака, эр ёки ўғлининг маълумотлари–таҳ.) кўрсатилади. Бундай картага эга бўлмаган аёлларга ишлашга рухсат берилмайди. Телеканал айрим ҳолларда эркак маҳрамлар бутун иш куни давомида офисда бўлиши шартлигини таъкидлаган.
“Бу буйруқ катта муаммо туғдирди. Кўпчилик оилаларда эркак аёли билан кун бўйи офисда ўтира олмайди”, деган исми очиқланмаган ходималардан бири.
Қайд этилишича, “маҳрам картаси”ни расмийлаштириш мураккаб бюрократик жараён бўлиб, уч кунгача вақт олади. Қолаверса, бундай ҳужжат учун вилоятнинг “эзгуликни тарғиб қилиш” бўлими раҳбари, маҳаллий кенгаш вакили, хавфсизлик хизмати ва иш берувчи билан келишиш зарур бўлади.
“Мазкур қадам афғонистонлик аёллар ҳуқуқларини чеклаш сиёсатининг навбатдаги босқичидир”, дея қайд этади телеканал.
Аввалроқ “Толибон” уларга олий ва ўрта таълимни, парк ҳамда гўзаллик салонларига боришни, шунингдек эркак ҳамроҳларсиз сафар қилишни тақиқлаган эди.
Бу орада, пойтахт Қобулда янги рейдлар ўтказилиб, ҳижоб ўраш қоидаларини бузишда айбланган ўнлаб аёллар ҳибсга олинди. БМТнинг Афғонистонга кўмак миссияси (UNAMA) ушбу ҳолатга баҳо бериб, бундай ҳаракатлар “аёлларни янада изоляция қилиш, қўрқув муҳитини кучайтириш ва жамиятдаги ишончни издан чиқаришига хизмат қилиши”ни таъкидлади.
Толибон ҳокимиятга қайтган 2021 йилдан буён афғонистонлик аёллар ҳуқуқлари кескин чекланди. Давлат идоралари кўплаб аёл ходимларини ишдан бўшатган, қизларнинг мактаб ва олийгоҳларга боришини тақиқлаган. Шунингдек, уларга кўчага ҳижобсиз чиқиш, омма олдида кўриниш бериш ва қўшиқ айтиш кабилар ҳам ман этилган.
Изоҳ (0)