“Tolibon” nazoratidagi Afg‘onistonning Qandahor viloyatida mahalliy hokimiyat davlat va xususiy sektorda mehnat qilayotgan ayollarga o‘zlari bilan “mahram kartasi” olib yurishni majburiy qildi.
Amu TV xabariga ko‘ra, hujjatda ayolning shaxsiy ma’lumotlari bilan birga uning erkak “qo‘riqchisi” (ota, aka, er yoki o‘g‘lining ma’lumotlari–tah.) ko‘rsatiladi. Bunday kartaga ega bo‘lmagan ayollarga ishlashga ruxsat berilmaydi. Telekanal ayrim hollarda erkak mahramlar butun ish kuni davomida ofisda bo‘lishi shartligini ta’kidlagan.
“Bu buyruq katta muammo tug‘dirdi. Ko‘pchilik oilalarda erkak ayoli bilan kun bo‘yi ofisda o‘tira olmaydi”, degan ismi ochiqlanmagan xodimalardan biri.
Qayd etilishicha, “mahram kartasi”ni rasmiylashtirish murakkab byurokratik jarayon bo‘lib, uch kungacha vaqt oladi. Qolaversa, bunday hujjat uchun viloyatning “ezgulikni targ‘ib qilish” bo‘limi rahbari, mahalliy kengash vakili, xavfsizlik xizmati va ish beruvchi bilan kelishish zarur bo‘ladi.
“Mazkur qadam afg‘onistonlik ayollar huquqlarini cheklash siyosatining navbatdagi bosqichidir”, deya qayd etadi telekanal.
Avvalroq “Tolibon” ularga oliy va o‘rta ta’limni, park hamda go‘zallik salonlariga borishni, shuningdek erkak hamrohlarsiz safar qilishni taqiqlagan edi.
Bu orada, poytaxt Qobulda yangi reydlar o‘tkazilib, hijob o‘rash qoidalarini buzishda ayblangan o‘nlab ayollar hibsga olindi. BMTning Afg‘onistonga ko‘mak missiyasi (UNAMA) ushbu holatga baho berib, bunday harakatlar “ayollarni yanada izolyatsiya qilish, qo‘rquv muhitini kuchaytirish va jamiyatdagi ishonchni izdan chiqarishiga xizmat qilishi”ni ta’kidladi.
Tolibon hokimiyatga qaytgan 2021-yildan buyon afg‘onistonlik ayollar huquqlari keskin cheklandi. Davlat idoralari ko‘plab ayol xodimlarini ishdan bo‘shatgan, qizlarning maktab va oliygohlarga borishini taqiqlagan. Shuningdek, ularga ko‘chaga hijobsiz chiqish, omma oldida ko‘rinish berish va qo‘shiq aytish kabilar ham man etilgan.
Izoh (0)