Бангладеш ҳукумати АҚШ президенти Дональд Трампни мамлакат учун божхона тўловларини пасайтиришга ишонтириш мақсадида Америка Boeing корпорациясидан 25 та самолёт харид қилишни таклиф этди. Бу ҳақда Бангладеш савдо вазири Маҳбубур Раҳмон маълум қилди.

Вазир 29-31 июль кунлари АҚШ савдо вакили мансабдорлари билан учрашувчи делегация таркибида икки томонлама музокараларда иштирок этади. Музокаралар божхона тўловларининг янги тизими 1 августда кучга киришидан бир неча кун олдин ўтказилади.
“Биз бажаришимиз мумкин бўлган мажбуриятларни зиммамизга олдик. Boeing хариди ушбу пакетнинг бир қисмидир. Агар улар бизнинг таклифимизни бошқаларники билан таққосласа, биз манфаатлироқ келишувга эришишимиз керак”, деди вазир Вашингтонга жўнаш олдидан берган интервьюсида.
Июль бошида Трамп 1 августдан бошлаб Америка бозорига кийим-кечак етказиб берувчи асосий давлат — Бангладеш товарларига 35 фоизлик бож жорий этишини эълон қилганди. Жанубий Осиё мамлакати энди ўз ставкасини АҚШнинг минтақадаги бошқа савдо ҳамкорлари даражасига — Вьетнам учун 20 фоиз, Индонезия ва Филиппин учун 19 фоизга туширишга интилмоқда.
Ўтган ҳафта Дакка америкалик буғдой ишлаб чиқарувчилар билан беш йил давомида ҳар йили 700 минг тонна дон импорт қилиш бўйича шартнома имзолади. Таъкидланишича, бу қадамлар Бангладешнинг АҚШ билан товар айирбошлашдаги тахминан олти миллиард долларлик ижобий салдони қисқартириш стратегиясининг бир қисмидир.
Бангладеш савдо вазирининг таъкидлашича, Бангладешнинг кенг кўламли хом ашё импортини Boeing билан потенциал келишув билан уйғунлаштирган чора-тадбирлар тўплами Вьетнамга таклиф қилинганидан кўра яхшироқ божхона ставкасига лойиқдир.
Изоҳ (0)