Британиянинг қирғоқларида қарийб 140 йил аввал чўкиб кетган ХIX асрга оид кема топилди. Бу ҳақда CNN хабар берди.
1888 йил ноябрь ойида “SS Nant” кемаси Корнуолл қирғоқларида чўкиб кетганида экипажнинг 23 аъзоси ҳалок бўлган, аммо ҳалокатнинг қаердалиги ҳозиргача сир бўлиб қолган эди.
Бу кашфиёт ғаввос Дом Робинсон сув остида идиш-товоқ бўлагини топганидан сўнг амалга оширилган. Қуруқликка қайтгач, 53 ёшли Робинсон синган ликопчада Cunard Steamship Company тамғаси борлигини кўрган. Шу орқали вайрон бўлган кемани интернетда мавжуд маълумотлар орқали аниқлашга муваффақ бўлинган.
“Немис елканли кемаси Теодор Ругер пароходни уриб юборган ўша машъум кунда об-ҳаво шароити жуда ёмон эди. У Nantʼнинг четини тешиб ўтиб, катта тешик очади. Бир неча соат давомида экипаж тешикни тўлдириш учун барча турдаги материаллардан, шу жумладан матраслардан фойдаланиб, кемани қутқаришга ҳаракат қилган. Аммо охир-оқибат улар бу жангда мағлуб бўлишади ва кема жуда тез чўкиб кетади”, деди Плимут университети тарих профессори ва денгиз эксперти Гарри Беннетт.
Тўқнашув Нантънинг қутқарув қайиқларига зарар етказган. Фақат 3 киши, жумладан, денгиздан топилган 1 киши ва кемадан сакраб тушган 2 киши омон қолган. Теодор Ругер ҳам ҳалокатга учради, аммо унинг қутқарув қайиқлари яхшироқ ҳолатда бўлгани учун экипаж аъзоларининг кўпчилиги тирик қолган.
Бу ҳақда ўзининг YouTube каналида маълум қилган Робинсоннинг CNN телеканалига айтишича, кема қолдиқлари ўтган йилнинг кузида Плимутдан 30 мил жануби-шарқда, Ла-Манш бўғозидан 75 метр чуқурликда топилган.
Изоҳ (0)