Оила қурган ва ажрашганлар: Ўзбекистонда никоҳга доир вазият таҳлил қилинди

Ярим йил мобайнида тузилган никоҳлар сони Самарқанд вилоятида, ажримлар Тошкент шаҳрида энг кўп қайд этилган. Бу ҳақда Статистика агентлиги маълум қилди.

Қайд этилган никоҳлар

2024 йил январь–июнь ойларида Ўзбекистонда 97,4 мингта никоҳ қайд этилди. Никоҳларнинг 50,1 мингтаси шаҳарларда, 47,3 мингтаси қишлоқларда тузилган.

Ярим йил мобайнида энг кўп никоҳлар Самарқанд вилоятида қайд этилган —10 197 та. Шу билан бирга, Қашқадарё (9 801 та), Фарғона (9 758 та), Сурхондарё (8 121 та) вилоятлари ҳамда Тошкент шаҳрида (9 000 та) тузилган никоҳлар улуши бошқа ҳудудларга нисбатан юқори бўлган.

Никоҳлар сонининг энг кам улуши Сирдарё вилоятига тўғри келган — 2 410 та. Ўз навбатида Навоий (2 661 та), Жиззах (3 518 та), Бухоро (5 818 та) вилоятлари ҳамда Қорақалпоғистонда (6 389 та) қолган ҳудудлардагидан кам оила қурилган.

Олти ой давомида никоҳланган аёллар ўртача 22,9 ёшда, эркаклар 27,8 ёшда бўлган. Бу даврда 25 ёшгача бўлган аёллар (76,2 фоиз) энг кўп турмуш қурган.

Маълумот учун, 2022 йил биринчи ярмида республикада 108,9 мингта, 2023 йил мос даврида 98,6 мингта никоҳ қайд этилган.

Никоҳдан ажралишлар

Жорий йилнинг биринчи ярмида мамлакатда никоҳдан ажралишлар сони 22,5 мингтани ташкил этди (2023 йил мос даврида 25,4 мингта бўлган). Ажримларнинг 13,8 мингтаси шаҳарларда, 8,6 мингтаси қишлоқларда қайд этилган.

Никоҳдан ажралишларнинг энг кўп улуши Тошкент шаҳрига тўғри келган—2 935 та. Шунингдек, Андижон (2 390 та), Фарғона (2 370 та), Тошкент (2 285 та) ва Самарқанд (2 265 та) вилоятларида нисбатан юқори улуш кузатилган.

Олти ой давомида энг кам никоҳдан ажралишлар Навоий вилоятида бўлган — 588 та. Ўз ўрнида Сирдарё (772 та), Жиззах (841 та), Хоразм (988 та) вилоятлари ҳамда Қорақалпоғистонда (907 та) нисбатан кам ажримлар рўйхатга олинган.

Мамлакатда эркаклар ўртача 37,1 ёш, аёллар 32,2 ёшда никоҳдан ажрашган. 35 ёшгача бўлган аёллар (64,1 фоиз) ажримларда энг катта улушни ташкил этган.

Ярим йил ичида фарзандсиз никоҳдан ажралишлар сони 10 479 та (46,6 фоиз) бўлган. Бир нафар фарзанд билан ажралишлар сони 6 616 та (29,4 фоиз), икки ва ундан ортиқ фарзанд билан ажралишлар 5 372 тага (24 фоиз) етган.

Таққослаш учун, 2022 йил январь–июнь ойларида Ўзбекистонда 24,6 мингта, 2023 йил мос даврида 25,4 мингта никоҳдан ажралишлар қайд этилган.