Қўшма Штатлар ва Хитой ўртасида савдо шартномаси имзоланди. Бу ҳақда Хитой савдо вазирлиги 9-10 июнь кунлари Лондонда бўлиб ўтган Хитой-Америка музокараси якунлари бўйича баёнотда маълум қилди.
Баёнотга кўра, Пекин назорат остидаги товарларни экспорт қилишни маъқуллайди. Қўшма Штатлар эса, ўз навбатида, Хитойга жорий қилинган бир қатор чекловларни бекор қилади. Пекин икки давлат раҳбарлари ўртасидаги муҳим консенсус ва 5 июнь куни бўлиб ўтган телефон мулоқоти чоғида билдирилган талаблар эътиборга олинишини кутмоқда.
Томонлар “консенсусни мустаҳкамлаш, тушунмовчиликларни камайтириш, ҳамкорликни ривожлантириш ва икки мамлакат ўртасидаги савдо-иқтисодий муносабатларнинг соғлом, барқарор ва изчил ривожланишига биргаликда ҳаракат қилиш”га келишиб олган.
АҚШ президенти Дональд Трамп 2 апрель куни бир қатор давлатлар, жумладан, Хитойга савдо божлари жорий этилишини эълон қилган. Бунга жавобан Пекин ҳам тарифлар жорий этган. Оқибатда, икки давлат ўртасида зиддият келиб чиққан. АҚШ Хитой товарларига божларни 145 фоизга, Хитой эса Америка товарларига божларни 125 фоизга кўтарганди.
Савдо можаросининг кескинлашуви фонида АҚШ ва Хитой расмийлари 10-11 май кунлари Женевада музокаралар ўтказиб, ўзаро тарифларни 90 кунга вақтинча тўхтатишга келишиб олган. Унга кўра, 14 майдан бошлаб Қўшма Штатлар Хитой товарларига божларни 145 фоиздан 30 фоизга, Хитой эса 125 фоиздан 10 фоизга туширганди.
Изоҳ (0)