Ташқи савдо: Ўзбекистон чет эл билан нималарни кўпроқ олди-сотди қилмоқда?

Статистика қўмитаси жорий йил январь май ойларидаги Ўзбекистон ташқи савдо айланмаси бўйича маълумотларни очиқлади.

Хитой пешқадам

Беш ой давомида Ўзбекистон ташқи савдо айланмаси 31,3 млрд долларга етди (2024 йил мос давридагидан 15 фоиз кўп). Шундан экспорт ҳажми 14,8 млрд доллар (йиллик ўсиш 31,1 фоиз), импорт 16,5 млрд доллар (ўсиш 3,7 фоиз). Ташқи савдо тақчиллиги — 1,7 млрд доллар.

Республика экспорт ва импортида энг кўп улуш Хитой (5,4 млрд доллар) ҳиссасига тўғри келмоқда. Кейинги икки ўринни Россия (4,8 млрд доллар) ва Қозоғистон (1,8 млрд доллар) эгаллаган.

Нималар экспорт қилинди?

Январдан майгача бўлган даврда Ўзбекистон Россияга (1,6 млрд доллар) энг кўп экспортни амалга оширган. Шу билан бирга, мамлакатдан Хитой (755 млн доллар), Қозоғистон (518,8 млн доллар) ва Афғонистон (515,9 млн доллар) нисбатан кўпроқ товар ва хизматлар сотиб олган.

Республикада экспорт тушумларининг қарийб 6,6 млрд доллари ёки 43,8 фоизи олтин сотувидан келган. Мазкур қиймат ўтган йил мос даврига нисбатан 56,9 фоизга кўп.

Экспорт тушумларининг кейинги йирик улуши хизматлардан келган — 3,24 млрд доллар (йиллик ўсиш 21,9 фоиз). Кейин хорижга 1,5 млрд долларлик саноат товарлари, 925,8 млн долларлик озиқ-овқат маҳсулотлари ва тирик ҳайвонлар ҳам сотилган.

Хизматлар экспортининг асосий улуши туризм (50,2 фоиз) ва транспорт (35,2 фоиз) хизматлари ҳиссасига тўғри келган.

Озиқ-овқат маҳсулотлари таркибида сабзавотлар ва мевалар улуши юқори бўлган — 619,6 млн доллар.

Мамлакат беш ойда 288 млн долларлик табиий газ экспорт қилган (йиллик ўсиш 62,7 фоиз). Ўз навбатида чет элга 212,4 млн долларлик нефть ва нефть маҳсулотлари (пасайиш 6,2 фоиз), 95,6 млн долларлик электр токи (ўсиш 72,6 фоиз) сотилган.

Ҳисобот даврида 1,05 млрд долларлик тўқимачилик маҳсулотлари экспорт қилинган. Бу ўтган йил мос давридагига нисбатан 18 фоизга кам. Шунингдек, хорижга автомобиллар сотуви ҳам (101,9 млн доллар) 26,9 фоизга камайган.

Машина ва “запчаст”лар импорти юқори

Январь май ойларида Ўзбекистон энг кўп импортни Хитойдан (4,64 млрд долларлик) амалга оширди. Мамлакат Россия (3,2 млрд доллар) ва Қозоғистондан (1,3 млрд доллар) ҳам нисбатан катта улушда товар ва хизматлар сотиб олган.

Импорт таркибида энг кўп улуш машиналар ва транспорт асбоб-ускуналари ҳиссасига тўғри келган. Бу даврда мамлакатга мазкур туркумдаги 5,5 млрд долларлик (жами импортнинг 33,6 фоизи) маҳсулотлар олиб келинган. Жумладан, 1,24 млрд долларлик автомобиллар, 671,2 млрд долларлик машиналар эҳтиёт қисмлари, 426,3 млн долларлик электр машиналари ва уларнинг жиҳозлари, 229,2 млн долларлик самолётлар импорт қилинган.

Январдан майгача бўлган даврда Ўзбекистонга 1,62 млрд долларлик озиқ-овқат маҳсулотлари ва тирик ҳайвонлар олиб келинган. Хусусан, 268 млн долларлик гўшт ва гўшт маҳсулотлари, 214,6 млн долларлик сабзавот ҳамда мевалар импорт қилинган.

Беш ойликда 285,5 млн долларлик табиий газ импорти амалга оширилган. Бундан харид улуши ўтган йил мос даврига нисбатан 55,8 фоизга қисқарган. Ўз навбатида 874,9 млн долларлик нефть ва нефть маҳсулотлари импорт қилинган (камайиш 8,2 фоиз).

Қайд этилган даврда мамлакатга қиймати 1,15 млрд долларлик чўян ва пўлат, жами 776,1 млн долларлик тиббиёт ҳамда фармацевтика маҳсулотлари импорти амалга оширилган.