Қозоғистоннинг Остона шаҳрида 22 июнь куни енгил моторли ТL-2000 самолёти қулаб тушди. Ҳодиса оқибатида икки киши ҳалок бўлди. Бу ҳақда мамлакат Транспорт вазирлиги хабар берди.
Маълум қилинишича, ҳодиса маҳаллий вақт билан соат 11:30 атрофида юз берган. Самолёт бортида экипажнинг икки аъзоси бўлган. Улар авиаҳалокат оқибатида ҳалок бўлган.
Самолёт Жоламан аэродроми ҳудудида ўқув-машғулот парвозини амалга ошираётган эди. Авиатехника хусусий шахсга тегишли бўлган. Ҳозирда ушбу авиаҳодисани ўрганиш бўйича комиссия тузилган.
Ҳодиса жойида Қозоғистон Транспорт вазирлигининг Транспорт ҳодисалари ва инсидентларини тергов қилиш департаменти ходимлари ишламоқда. Авария ҳолати ва техник тафсилотлари ҳозирча номаълум. Тергов барча эҳтимолий версияларни, шу жумладан, техник носозлик ва инсон хатоси омилини кўриб чиқмоқда.
Қозоғистон Транспорт вазирлиги текширилмаган маълумотларни тарқатишдан тийилишга ва терговнинг расмий натижаларини кутишга чақиради. Жоламан аэродроми машғулот ва шахсий парвозлар учун фойдаланиладиган кичик авиация майдончаларидан биридир.
Изоҳ (0)