Мазкур актёрлар мунтазам равишда мухлисларни экранлар қаршисига тўплаб, қизил гиламларнинг доимий меҳмонлари бўлган. Бироқ маълум бир пайтда улар кинони тарк этишга қарор қилган.
Жек Николсон
Голливуднинг тирик афсонаси учта “Оскар”, еттита “Олтин глобус” совриндори, “Какку уяси узра парвоз”, “Ёрқинлик” ва “Муртадлар” каби машҳур фильмларда унутилмас роллар ижрочисидир. Бироқ 2010 йилда “Қандай билса бўлади...” романтик комедиясидан сўнг, Николсон кутилмаганда экранлардан ғойиб бўлди. У хотирасидаги муаммолар туфайли репликаларни эслаб қолишга қийналаётгани ва шу сабабли суратга тушишни тўхтатгани ҳақида миш-мишлар тарқалди. Николсоннинг ўзи бу тахминларни рад этиб, шунчаки муносиб сценарийлар топилмаётганини маълум қилди.
2017 йилда унинг дўсти Питер Фонда актёр ҳақиқатан ҳам ижодни тўхтатганини айтди. У ўз даражасидаги санъаткор орзу қилиши мумкин бўлган барча ютуқларга эришган ва энди камералардан узоқда сокин ҳаётдан завқланишга қарор қилган. Николсон фаолиятини тўхтатишининг асл сабаблари ҳануз сир. Эҳтимол, бу ёш билан боғлиқдир — 2025 йил баҳорида у 88 ёшга тўлди. Қандай бўлмасин, Жек тирик афсона мақомини сақлаб қолган ҳолда кинони тарк этди.
Айтиш жоизки, Николсон сўнгги марта 2023 йил апрелида жамоатчилик олдида кўринган — ўшанда у Лос Анжелесдаги баскетбол ўйинини томоша қилган.
Майкл Ж. Фокс
“Келажакка қайтиб” трилогиясидаги Марти Маклафй роли туфайли Майкл Ж. Фокс машҳурликка эришди. Бироқ 1991 йилда, 30 ёшида унга Паркинсон ташхиси қўйилди. Дастлаб актёр ҳолатини яшириб, суратга тушишни давом эттирди. 1998 йилга келибгина Майкл Жей жиддий касал эканини ошкора тан олди.
Аҳволи ёмонлашиб бораётганига қарамай, Фокс фильмларни овозлаштиришда фаол иштирок этди ва телевидениеда эпизодик ролларда кўринди, шунингдек, Паркинсон касаллигини ўрганиш бўйича тадқиқотларни қўллаб-қувватлаш учун хайрия жамғармасини ташкил этди. Бироқ касаллик кучайди ва 2020 йилда Майкл ўз фаолиятини якунлаганини расман эълон қилди. Шундай бўлса-да, санъаткор вақти-вақти билан жамоатчилик олдида пайдо бўлиб туради ва турли лойиҳаларда иштирок этишни давом эттирмоқда.
2023 йилда Дэвис Гуггенхайм актёр иштирокида “Ҳали ҳам: Майкл Ж. Фокс фильми” номли ҳужжатли фильм суратга олди. 2024 йилнинг ёзида эса Фокс Буюк Британиядаги Гластонбери фестивалида Coldplay гуруҳи билан саҳнага чиқди. У ва гуруҳ етакчиси Крис Мартин “Fix You” қўшиғини ижро этишди, санъаткор эса уни машҳур қилган фильмда куйлаган Чак Беррининг “Жоҳннй Б Гооде” қўшиғидаги риффни такрорлади.
Ева Мендес
Актриса “Қўшалоқ форсаж”, “Ҳитч усули” ва “Қарағайлар остида” фильмларидаги роллари билан яхши танилган. 2014 йилда фантастик триллердан сўнг, Эва Мендес бирдан фильмга тушишни тўхтатди.
2024 йил март ойидаги суҳбатда Мендес қизлари Эсмералда ва Амада тарбиясига эътибор қаратишга қарор қилганини айтди. Унинг айтишича, турмуш ўртоғи Райан Гослинг бу танловни тўлиқ қўллаб-қувватлаган. Ишдаги узоқ танаффусга қарамай, Мендес агар қизиқарли таклиф бўлса, кинога қайтиш эҳтимолини рад этмади. У ҳеч қачон фаолиятини расман якунламаганини, балки оиласи учун вақтинча тўхтатганини таъкидлади.
Брюс Уиллис
Актёр “Ўтда ёнмас” жангари фильмдаги Жон Макклейн ролидан сўнг машҳурликка эришди, “Бешинчи элемент”, “Армагеддон” ва “Жиноий асар” фильмлари эса унинг муваффақиятини мустаҳкамлади. Брюс Уиллиснинг харизмаси ва қатъиятли қиёфаси уни жангари фильмлар афсонасига ва Голливуднинг энг таниқли юлдузларидан бирига айлантирди.
Бироқ 2010 йилларда Уиллис кўпроқ кам бюджетли фильмларда кўрина бошлади. 2022 йил март ойида актёрнинг оиласи бунинг сабабларини тушунтирди: Брюсга афазия — нутқ, хотира ва ақлий қобилиятларга таъсир этувчи касаллик ташхиси қўйилганди.
Касаллигига қарамай, рафиқаси Эмма Ҳеминг, собиқ турмуш ўртоғи Деми Мур ва беш фарзанди — бутун оила ушбу оғир дамда санъаткорни қўллаб-қувватламоқда. 2023 йилда шифокорлар Уиллисда деменция борлигини тасдиқлади, бу касаллик туфайли актёрнинг аҳволи ёмонлашмоқда.
Изоҳ (0)