Ўтган ҳафта интернетда Женнифер Лопеснинг Тошкентдаги концертидан олинган лавҳалар катта шов-шувга сабаб бўлди. Бу шов-шув 56 ёшли хонанданинг ҳайратланарли даражада гўзал кўриниши туфайли эди. Қадди-қомати келишган, энергияга тўла, терисида бирорта ҳам ажин кўринмасди. Ростини айтганда, ҳақиқий ёшини билмаган одам хонандани 30 ёшларда деб ўйлаши мумкин.
Гўё Жей Ло ёшлик эликсирини топгандек эди. Аммо аслида бунинг сири анча оддий ва ҳар биримиз учун эришса бўладиган даражада.
- Биринчи одати — спорт
Женнифер Лопес қанчалик банд бўлмасин, ҳафтасига 4–5 марта машқ қилади, ҳатто туғилган кунида ҳам спортдан воз кечмайди. У ҳар куни соат 4:45 да туриб, иш бошланишидан олдин залга кириб чиқади.
Лос-Анжелесда у машҳур Трейси Андерсон билан ишлайди. Трейси кўпроқ ўз оғирлиги билан бажариладиган машқларга эътибор беради: ҳар бир машқ 60–100 марта такрорланади. Асосий урғу қорин, сон ва оёқ мушакларига қаратилган.
Нью-Ёркда эса Лопес Девид Кирш билан шуғулланади. У функсионал тренинг устаси бўлиб, машғулотлари қаттиқроқ: кикбоксинг, айлана машқлар, берпи, планка. Унинг “ўрдак юриши” деб аталадиган махсус машқи — кенг “приседания”да олдинга юриш бўлиб, бунда сон мушаклари ишлайди.
Сизга маслаҳат: Эрталаб соат 5 да туриш шарт эмас. Ҳафтасига 3–4 марта, 45–60 дақиқа машқ қилишнинг ўзи кифоя. Асосий нарса — мунтазамлик. Машқ турларини алмаштириб туриш (масалан, куч машқлари, ёга ёки рақс) бир томондан зериктирмайди, иккинчи томондан турли мушакларга фойдали.
- Иккинчи одати — уйқу
Женнифер Лопес: “Тўлиқ уйқу – менинг энг катта гўзаллик сирим”, дейди. У ҳар куни 8–10 соат ухлашга қатъий амал қилади: тўлиқ қоронғилик, ҳеч қандай телефонсиз. Деразаларда қалин парда бўлиши шарт.
Бу оддий туюлиши мумкин, аммо илм-фанга кўра айнан уйқу пайтида тери тикланади, коллаген ва ўсиш гормони ишлаб чиқарилади. Уйқусизлик дарҳол юзда билинади — қора ҳалқалар, хира тери, ажинлар. Доимий уйқусизлик эса қариш жараёнини тезлаштиради.
Ҳатто суратга олиш ишлари тун бўйи чўзилса ҳам, Женнифер тўлиқ дам олиш учун вақт ажратади.
Сизга маслаҳат: Ухлашдан бир соат олдин барча гаджетларни ўчириб, уйқуга тайёргарлик режимига ўтинг — илиқ ванна, китоб ўқиш ёки медитация. Унутманг, 7–8 соат уйқу ҳашамат эмас, балки заруратдир.
- Учинчи одат — сув
Женнифер Лопес ҳар куни 12 стакан сув ичади — бу деярли уч литр. Унингча, “Намлик — терининг ёш ва ёрқин кўринишининг энг катта сири.” Ҳақиқатдан ҳам сувсизланган тери тезда хира ва бўшашган бўлиб қолади.
Аммо гап фақат сувда эмас. Женнифер танани сувсизлантирадиган нарсалардан бутунлай воз кечган: алкоголь, қаҳва ва сигарет. Уларнинг барчаси тери рангига ва силлиқлигига салбий таъсир қилади.
Жей Ло овқатланишда ҳам қатъий: эрталаб мевали оқсилли коктейл, тушликда товуқ ёки балиқ гуруч дуккакли салат билан, кечки овқатда оқсил ва кўплаб сабзавот. Ширинликлар, қовурилган таом ёки яримтайёр маҳсулотлар йўқ — фақат янги, мавсумий ва асосан буғда пиширилган овқатлар.
Косметика масаласида ҳам ўзига хос йўли бор: Женнифер қиммат кремлар йиғмайди, балки дерматологлар унга алоҳида тайёрлаб берган воситалардан фойдаланади. Бундай косметика қисқа муддатли бўлса ҳам максимал самарали — унда керакcиз қўшимчалар йўқ, фақат керакли фаол моддалар бор.
Сизга маслаҳат: Сув ичишни аста-секин кунига 2–2,5 литргача етказинг. Қаҳвани камайтиришга ҳаракат қилинг. Қиммат крем сотиб олиш ўрнига, яхши косметологга мурожаат қилинг ва айнан тери турига мосини танланг.
Изоҳ (0)