Россия Украинанинг бешта ҳудуди бўйича ён беришга рози бўлди. Бу ҳақда АҚШ президенти махсус вакили Стив Уиткофф маълум қилди.
АҚШ президенти Дональд Трамп 18 август куни Украина раҳбари Владимир Зеленский билан музокара олиб боради. Уиткоффнинг сўзларига кўра, улар “пировардида Украина назорати остида бўлган” ҳудудларни муҳокама қилади. Россиянинг ён бериши шундан иборатки, у “бутун Украинани ўзига қўшиб олмайди”, деди Уиткофф.
Умид қиламанки, бу масалада маълум даражада аниқликка эришамиз ва яқин орада буларнинг барчаси тинч йўл билан ҳал этилади, деди Трампнинг махсус вакили.
Шунингдек, у Аляскадаги музокаралар чоғида Путин Украинага “жиддий хавфсизлик кафолатлари” беришга ва ҳатто “Украина ҳамда бошқа Европа мамлакатларига ҳужум қилмаслик мажбуриятини қонуний жиҳатдан мустаҳкамлаш”га тайёр эканини айтган.
Уиткофф бу келишувларни “бурилиш нуқтаси” деб атаб, уларни даражаси жиҳатидан НАТОнинг 5-моддасига қиёс қилди. Унга кўра, бир давлатга қилинган ҳужум барча давлатларга қилинган ҳужум сифатида баҳоланади.
АҚШ давлат котиби Марко Рубио эса “келишувга эришишнинг ягона йўли — томонларнинг ҳар иккиси ниманидир қўлга киритиб, нимадандир воз кечиши” эканини таъкидлади. У шу сабабли эртага Зеленскийнинг Аляскага ташрифи муҳим эканини қайд этди.
Изоҳ (0)