Германияда Европа давлатлари етакчилари ва Америка Қўшма Штатлари президенти Дональд Трамп онлайн мулоқот ўтказади. Мулоқотда иштирок этиш учун Украина президенти Владимир Зеленский ҳам Германияга борди. Бу ҳақда Reuters агентлиги хабар берди.
Зеленский Германия канцлери Фридрих Мерц билан учрашган. Шундан сўнг икки томонлама музокаралар бошланган.
Таъкидланишича, Зеленский ва Мерц Финляндия, Франция, Британия, Италия, Польша ва Европа Иттифоқи етакчилари билан видеоконференцияда иштирок этади. НАТО бош котиби Марк Рютте ҳам йиғилишга қўшилиши кутилмоқда. Кейинроқ Трамп ва вице-президент Ж.Д. Венс мулоқотга уланади.
“Тез орада Европа етакчилари билан гаплашаман. Улар келишув бўлишини истайдиган ажойиб инсонлар”, деб ёзган Трамп ижтимоий тармоқда.
Манбага кўра, Европа етакчилари Трамп ва Путин иштирокида ўтказилиши режалаштирилган учрашувда Украина манфаатларига зид қарорлар чиқарилиши мумкинлигидан хавотирда. Улар Украинанинг манфаатлари ва талабларини Трампга етказишга уринади.
Қайд этилишича, Америка президенти Путин билан Аляскадаги учрашувининг мақсади тинчлик масаласида ўзаро фикр алмашиш бўлади. Бундан олдин Трамп тинчлик бўйича ҳар қандай келишув баъзи ҳудудларни ўзаро алмашиш эвазига бўлиши мумкинлигини айтган. Шу сабабли Европа етакчилари Путин ва Трампнинг учрашувидан ташвишланмоқда.
Аляскадаги саммит натижаларини олдиндан башорат қилиб бўлмаслиги Европада хавотир уйғотмоқда. Улар АҚШ ва Россия ўзаро кенг қамровли қарорлар қабул қилиб, Украинани ноқулай келишувга мажбурлашидан қўрқади.
“Биз ҳозир бунинг олдини олишга эътибор қаратаяпмиз. АҚШ ҳамкорлари билан биргаликда ишлаяпмиз. Европа томонининг мувофиқлиги ҳамда бирлигини сақлаяпмиз”, деган шарқий европалик юқори лавозимли амалдорлардан бири.
Трампни ранжитмаслик учун Европа етакчилари унинг саъй-ҳаракатларини олқишламоқда. Бироқ улар Украина ҳудудининг қарийб бешдан бир қисмини Россия босиб олганини таъкидлаб, Украина иштирокисиз ҳеч қандай келишув бўлмаслигини қайта-қайта такрорлашмоқда.
12 август куни Трамп Европанинг хавотирларига жавобан, Путин билан учрашувда фақатгина тинчликка эриш учун қандай шартлар кераклигини тинглаш ниятида эканини билдирди.
Gallup институти ўтказган тадқиқотларга кўра, украиналикларнинг 69 фоизи урушнинг тезроқ якунланишини истайди. Бироқ Россия фойдасига жиддий ён беришлар эвазига эмас.
Изоҳ (0)