UFCнинг собиқ енгил вазн тоифаси чемпиони Чарльз Оливейра Илия Топурияга қарши жангдаги мағлубияти ҳамда кейинги баҳсга тайёргарлиги ҳақида фикр билдирди. Бу ҳақда Championat нашри хабар берди.
Мени ҳеч қачон нокаут қилишмаган. Бу ҳолат илк бор юз берди. Афсуски, кучли спортчига қарши баҳсда муддатидан олдин ютқаздим. Уйга тушкун ҳолатда қайтдим, йиғладим ва жаҳлим чиқди. Аммо ҳозир мен ҳар қачонгидан ҳам яхшироқман. Сўзларимни ёдда тутинг: ярадор шер — барибир шерлигича қолади. 12-октябрь куни менинг ҳикоям тугамаганини исботлайман, — деди Оливейра AgFight нашрига берган интервьюсида.
Эслатиб ўтамиз, 2025 йил 29 июнь куни бўлиб ўтган UFC 317 турнирида бразилиялик жангчи Илия Топурияга қарши чемпионлик камари учун кечган баҳснинг биринчи раундидаёқ нокаутга учраган эди.
Чарльз Оливейра навбатдаги жангини 12-октябрь куни UFCнинг Рио-де-Жанейрода ўтадиган турнирида Рафаэл Физиевга қарши ўтказади. Ушбу баҳс кечанинг асосий жанги бўлиши кутилмоқда. Бу беллашув бразилиялик спортчи учун уч ойлик танаффусдан кейинги илк жанг бўлади.
Изоҳ (0)