Хитой Россия ва Эрон нефтини сотиб олишдан воз кечиш ҳақидаги АҚШнинг талабига қатъий рад жавобини берди. Бу ҳақда Хитой ташқи ишлар вазирлигига таяниб, Arab News хабар берди.
Хитой вакиллари воз кечиш тўғрисидаги қарорни Стокгольмдаги икки кунлик савдо музокараларидан сўнг маълум қилган.
“Хитой ҳар доим энергия таъминотини миллий манфаатлар асосида қуради. Мажбурлаш ва босим ўтказишдан фойда йўқ. Биз суверенитет, хавфсизлик ва тараққиёт манфаатларимизни қатъий ҳимоя қиламиз”, дейилади ТИВ баёнотида.
АҚШ Молия вазири Скотт Бессентнинг айтишича, Хитой нефть савдоси борасида ўз суверенитетини жиддий ҳимоя қилмоқда.
“Хитой бу масалада мустақил қарор қабул қилмоқчи. Шунинг учун, эндиликда хитойликлар 100 фоизлик бож тўлашга мажбур бўлади”, деди Бессент.
Шунга қарамай, АҚШ ва Хитой ўртасида савдо келишуви бўйича умид сақланиб қолинаётгани таъкидланган.
“Келишувга эришиш учун асослар бор”, деди Бессент ОАВга берган интервьюсида.
Экспертларнинг фикрича, Хитой Эрон ва Россия нефтини сотиб олиш бўйича ўз позициясини ўзгартириш ниятида эмас. Чунки нефть Пекин учун муҳим стратегик ресурс ҳисобланади ва мамлакат ёнилғини арзон нархларда харид қилмоқда. АҚШнинг Энергетика ахборот бошқармаси маълумотларига кўра, Эрондан экспорт қилинаётган нефтнинг 80–90 фоизи айнан Хитойга йўналтирилади.
Шу билан бирга, АҚШ Сенатида Россия нефтини харид қилаётган мамлакатларга 500 фоизгача бож солишни назарда тутувчи қонун лойиҳаси ҳам илгари сурилмоқда. Ташаббус муаллифи сенатор Линдси Гремнинг таъкидлашича, бу орқали Россия ҳарбий салоҳиятини молиялаштираётган давлатлар босим остига олинади.
Изоҳ (0)