7 августда Тошкентда концерт беришни режалаштираётган америкалик қўшиқчи ва актриса Женнифер Лопес UzReport телеканалига интервью берди. У ушбу интервьюда Ўзбекистонга олдин ҳам бир неча марта келгани ҳақида сўзлаб берди.
“ “Мен аввал Тошкентда бир неча марта туғилган кун ва тўйларда куйлаганман, шунинг учун у ерга қайтишдан хурсандман. Ҳеч қачон катта шоу қилмаганман, шунинг учун Марказий Осиё бўйлаб сафар қилаётганимизда, “Албатта, Тошкентга боришимиз керак,” деб ўйладим. У ердаги одамларни кўриш ва биринчи марта катта томоша қўйиш менга катта ҳаяжон бағишлаяпти,” деди Женнифер Лопес.
Тошкентда сизни кўплаб мухлислар кутмоқда. Сиз улар учун қандай совғалар тайёрлаб қўйгансиз, дея берилган саволга Женнифер қуйидагича жавоб берди.
“Концертда кўплаб машҳур хитларимни ижро этаман, лекин бу гастролда янги қўшиқларни ҳам тақдим этаман — яқинда чиқарилган Биртҳдай ҳамда бошқа янги қўшиқлар бор. Шунингдек, озгина испанча қўшиқларни ҳам куйлайман, чунки илгари ҳеч қачон гастролларда бундай ижро қилмаганман. Мухлисларимнинг севимли қўшиқлари — масалан, Ain’it Funny va Play каби қўшиқларни ҳам эшитиш имконияти бўлади. Узоқ вақт давомида улар сўраган нарсаларни беришга ҳаракат қиламан,” дея таъкидлади у.
Хонанда дунё мамлакатлари бўйлаб уюштирилган гастрол сафарларидан қандай таассуротда эканлиги ҳақидаги саволга ҳам жавоб берди.
“Ҳар бир тур бир-биридан фарқ қилади. Неча марта чиқиш қилганимдан қатъи назар, ҳар бир шоу мен учун қадрли. Яқинда Free деб номланган янги қўшиқ ёздим. Бу қўшиқ шоунинг барча ҳиссий моҳиятини ифодалайди: тун бўйи ухламаслик, эркинлик, ҳаётни нишонлаш, ўзлигимизни баён қилиш ва ажойиб вақт ўтказиш. Менга айнан шу ғоя ёқади. Ўзимни эркин ҳис қилиш, тун бўйи завқланиш ва ҳозирги лаҳзани қадрлаш мен учун қизиқарли. Ана шу руҳда гастрол қиламан.” деди Женнифер Лопес.
Марказий Осиёдаги биринчи гастрол ҳақидаги фикрлар
Женнифер Лопес Марказий Осиё давлатлари, хусусан Тошкентдаги концерти олдидан ҳаяжонда эканлигини ҳам яширмади.
“Бу минтақадаги биринчи гастролим, шунинг учун жуда ҳаяжонланаяпман. Аввал Тошкентда шахсий концертларим бўлган, улар менга доим ёққан. Одамларни яхши кўраман, шунинг учун бу сафар томошабинлар билан чинакам танишиш имконияти мени қувонтиради”, дейди Женнифер.
Ҳаётдаги асосий қадриятлар
Женнифер Лопез саҳна ортида унга ким илҳом ва куч бериши ҳақида гапирди.
“Биласизми, мен аввало онаман. Икки фарзандим бор. Улар ҳозир катта бўлиб, ўрта мактабнинг охирги синфига ўтиш арафасида. Мен қилаётган барча ишларим, ҳаётим уларнинг тарбияси ва келажакдаги ҳаётларига йўналтирилган. Улар менинг илҳом манбаим ва доимо қалбимда нур ва муҳаббат билан яшайди”, дейди у.
Хонанда инсоннинг “Севган ишини севимли инсонлари билан биргаликда қилиши” ўта муҳим эканлигини айтади.
“Мен одамларни айнан ўзлари бўлишга, эркинликни ҳис қилишга ва севимли инсонлари билан ўзлари ёқтирган ишни қилишга ундашни хоҳлайман. Концертларимда ҳам шу ҳақда гапираман — севган инсонларингиз билан ҳаётингиздаги энг севимли ишни бажариш ҳақида. Агар буни амалга оширсангиз, ҳақиқатан ажойиб ҳаёт кечиришингиз мумкин. Шу сабабли, умид қиламанки, мен бошқаларни ўзлигини топишга ва бахтли бўлишга илҳомлантираман” деди у.
Кичик орзулар ва келажак режалари
Четдан қараганда ҳеч қандай армони йўқдек туюладиган хонанда аслида унинг ҳам ҳозирча ушалмаган орзулари борлигини айтади.
“Ҳаётимизнинг турли даврларида турли орзулар пайдо бўлади. Мен узоқ вақтдан бери санъат билан шуғулланаман ва бу менинг орзуимнинг амалга ошиши. Аммо шу билан бирга ҳаётимни бир оз секинлаштиришни, кўпроқ завқланишни, масалан, кундузи қаҳвахонада бемалол ўтиришни орзу қиламан. Мен одамлар ҳаётини кузатишни яхши кўраман. Ишга кетаётганимда, “Куннинг ўртасида қаҳвахонада ўтирган бу одамлар ким?” деб ўйлайман. Бир кун келиб, мен ҳам шундай ҳаёт кечиришни истайман. Бу кичик нарсалар, аммо ҳаёт тарзи ва қандай яшашни хоҳлаётганингиз ҳақида, деди Женнифер Лопес.
Жаҳон юлдузи Женнифер Лопесга суҳбат якунида Ўзбекистондан кичик совға топширилди. Бу қўлда тикилган ва жуда чиройли миллий тўн эди.
“Буни ҳозироқ кийиб оламан, ранги менга жуда ёқди”, деди у.
“Салом, Ўзбекистон. Кейинги манзил — Тошкент. Тайёрланинг, мен йўлга чиқяпман. Тез орада кўришамиз.”, дея суҳбатни якунлади Женнифер.
Изоҳ (0)