Ижтимоий тармоқларда “Самарқанд вилоят ободонлаштириш департаменти раҳбари вилоят экология бошқармаси бошлиғининг ўринбосарига дарахтларни кўчириш топшириғини бераётгани” тўғрисида видеомурожаат тарқалди. Бу ҳолатга вилоят Экология бошқармаси расмий муносабат билдирди.
Қайд этилишича, Самарқанд вилоят ҳокимлигининг корхона ва ташкилотлар ҳамда мутасадди ташкилотлар вакилларидан тузилган ишчи гуруҳи томонидан жойлардаги экологик ҳолатлар ўрганилиши жараёнида тадбиркорлик субъектларидан бири томонидан ўрнатилган кузатув камераларида ёзиб олинган видеотасвирлар тармоқларда тарқатиб юборилган.
“Мазкур ҳолат юзасидан айни пайтда тегишли тартибда ўрганиш ишлари олиб борилаётганлигини маълум қиламиз”, дейилади бошқарма хабарида.
Таъкидлаш жоиз, дарахтларни кўчириш мавсумга боғлиқ бўлиб, айниқса, катталашиб улгурган дарахтларни бошқа жойга ўтқазиш алоҳида агротехник жараён ҳисобланади.
Бунда энг қулай пайтлар баҳор фаслида февраль охири, март ва апрель ойлари бўлса, кузда октябрь-декабрь ойлари оралиғида дарахтларни кўчириш ишларини олиб бориш мақсадга мувофиқ бўлади. Аммо ёз ойлари ҳамда вегетация даврида бундай ҳаракатларни қилиш тавсия этилмайди.
Аввалроқ бунга мисол бўла оладиган ҳолат Бухоро вилоятида кузатилган эди. Унда “М.Г” МЧЖ мансабдор шахслари “қулай” пайтдан фойдаланиб, тиббиёт маркази ҳудудида дарахтлар ноқонуний тарзда кўчирилган.
Ушбу ҳолатда жами 38 туп қимматбаҳо дарахт кўчириб ўтказилган бўлиб, уларнинг 26 тупи нобуд бўлганлиги аниқланганди.
Изоҳ (0)