“Тошкент—Шарқий” аэропорти қурилишини 2025 йил сентябрь ойи бошида якунлаш режалаштирилмоқда. Бу ҳақда Uzbekistan Airways матбуот хизмати Spotъга маълум қилган.
Қайд этилишича, янги аэропортга фақат бизнес-авиациянинг чартер рейсларигина кўчирилади.
Июнь ойи ўрталарида Шавкат Мирзиёев ушбу аэропорт қурилишининг бориши билан танишганди. Ўша пайтда иккита терминал — расмий делегацияларни қабул қилиш ва бизнес авиациясига хизмат кўрсатиш учун мўлжалланган, шунингдек, самолётлар тўхташ майдони ва ангар иншоотлари қурилиши давом этаётганди. Давлат раҳбари лойиҳанинг техник хусусиятлари, терминалларнинг архитектуравий ечими билан танишиб, қурилиш ишларини жадаллаштириш бўйича топшириқлар берганди.
Аэропорт ноқулай об-ҳаво шароитларида ҳам учиш-қўнишни таъминловчи ICAO III-А тоифасидаги илғор радиотехника ва метеорология ускуналари билан жиҳозланади. Бу туман ва кўриш нолга тенг бўлган шароитда ҳам парвозларни қабул қилиш имконини беради.
Тақдим этилган бош режага кўра, ушбу аэропортнинг умумий майдони 561 гектарни ташкил этади. Йўловчи терминали соатига 100 кишигача хизмат кўрсатади. Аэродром перронида бир вақтнинг ўзида 23 та икки палубали Boeing-747 самолётлари сиғиши мумкин бўлади. Ёпиқ ангарларда самолётлар соз ва хавфсиз сақланиши учун замонавий шароитлар таъминланади.
Собиқ ҳарбий аэродром негизида янги аэропорт қурилиши президентнинг 2017 йил 30 июндаги қарорига мувофиқ амалга оширилмоқда. Шавкат Мирзиёев 2023 йилнинг июль ва 2024 йилнинг сентябрь ойларида ҳам “Тошкент—Шарқий” аэропорти қурилишини кўздан кечирганди. Қурилиш ишларини молиялаштириш, терминалнинг ташқи кўриниши ва делегациялар учун қулайликларни қайта кўриб чиқиш бўйича топшириқлар берганди.
Изоҳ (0)