Ўзбекистон қонунчилигида 2025 йил 1 августдан бир қатор ўзгариш ва янгиликлар кучга кирди. Қуйида ушбу санадан кучга кирган асосий ўзгаришлар тақдим этилди.
Иш ҳақи ва стипендиялар ошди
Бюджет ташкилотлари ходимларининг иш ҳақи ва стипендиялар миқдори 10 фоизга оширилди.
Бунда:
- меҳнатга ҳақ тўлашнинг энг кам миқдори — ойига 1 271 000 сўм;
- базавий ҳисоблаш миқдори — 412 000 сўм этиб белгиланди.
Жарималар ошди
Базавий ҳисоблаш миқдори 10 фоизга ошгани жарималар ҳам кўтарилишига олиб келди. Шу жумладан йўл ҳаракати қоидаларини бузганлик учун жарималар ўзгарди.
Энг кенг тарқалган жарималар миқдори қуйидагича бўлди:
- камар тақмаслик — 206 000 сўм;
- техник кўрик ёки дори қутиси бўлмаслик — 206 000 сўм;
- ҳужжатсиз ҳайдаш — 412 000 сўм;
- суғуртасиз машина бошқариш — 412 000 сўм;
- светофорнинг қизил чироғида ўтиш — 1 236 000 сўм;
- нотўғри парковка — 824 000 сўм;
- телефонда гаплашиш — 1 236 000 сўм;
- автомобилни давлат рақамисиз бошқариш — 20 060 000 сўм;
- тезлик (+20 км/соат) — 412 000 сўм;
- қарама-қарши йўлда ҳайдаш — 4 120 000 сўм;
- маст ҳолатда машина ҳайдаш — 10 300 000 сўмгача ёки 3 йилгача дисквалификация;
- рухсатсиз тонировка — 10 300 000 сўм.
Чиқинди хизматидан қарзи борлар электр токига тўлов қила олмайди
Ҳар ойнинг 3-санасигача чиқинди хизматидан қарздорлар тўғрисидаги маълумотлар “Ҳудудий электр тармоқлари” АЖ биллинг тизимига узатилади. Сўнгра қарздор истеъмолчиларга ҳар ойнинг 5-санасигача хабарнома юборилади. Огоҳлантириш юборилганидан сўнг, қарздорликни бартараф этишга беш кун муддат берилади.
Мавжуд қарздорлик ушбу муддат ичида тўланиши лозим. Акс ҳолда электр энергияси учун тўлов қилиш имконияти вақтинчалик чекланади. Қарздорлик бартараф этилиши билан чеклов автоматик олиб ташланади.
Айрим оилалар фарзандларини қабул қилган боғчаларга компенсация тўланади
Айрим тоифадаги оилалар фарзандларини қабул қилган оилавий нодавлат мактабгача таълим ташкилотларига ушбу болалар таъминоти учун ота-оналар тўловининг бир қисмини давлат бюджетидан қоплаб бериш (компенсация ажратиш) тартиби жорий қилинади. Бунда компенсация бола таъминоти учун ота-оналар тўловининг 40 фоизи миқдорида ажратилади.
Барча вилоят ва туман ҳокимликларида иш ҳақи оширилди
16 июнь куни президент раислигида ўтказилган йиғилишда давлат раҳбари “ишчан ва жозибадор муҳит яратиш” учун 1 августдан барча вилоят ва туман ҳокимликларида иш ҳақи оширилишини маълум қилди. Ходимларга ишига қараб ойлик устама ва қўшимча бонус берилади.
Айрим экологик текширувлар Ягона давлат назорати тизимида рўйхатга олиш орқали ўтказилади
Давлат экологик назорат инспекцияси инспекторлари айрим ҳолатларда тезкор назорат тадбирларини текширувлар бошлангандан сўнг 24 соат ичида “Ягона давлат назорати” ахборот тизимида рўйхатга олиш орқали амалга оширади.
Бу Бизнес-омбудсманни хабардор этиш тартибида қуйидаги ҳолатлар аниқланганда татбиқ этилади:
- юридик шахсларнинг ўз ҳудудида бино, иншоотларни ёки бошқа объектларни қуриш, реконструкция қилиш чоғида белгиланган талабларни бузиб, кимёвий, биологик воситаларни қўллаган ҳолда дарахтларни, буталарни ёки бошқа ўсимликларни қасддан шикастлантириш, пайҳон қилиш ёки йўқ қилиш;
- ўлчами 500 кв/метр ва ундан ортиқ бўлган қурилиш майдонида чанг ва қум заррачаларининг ҳавога кўтарилишини бартараф этишга доир мажбурий талабларни бузиш ёхуд ушбу ҳудудларда ифлослантирувчи моддаларнинг йўл қўйиладиган нормативлардан ортиқ даражада атмосфера ҳавосига чиқарилишига йўл қўйиш;
- ярим эркин шароитларда, сунъий яратилган яшаш муҳитида ёки тутқунликда сақланиши тақиқланган ёввойи ҳайвонларни сақлаш.
Давлат органларида мажбурий жисмоний тарбия ва ҳаракат фаоллиги тадбирлари бошланди
Давлат хизматчилари ўртасида соғлом турмуш тарзини тарғиб қилиш мақсадида давлат органлари ва ташкилотларида ҳар иш кунининг муайян вақтларида жисмоний тарбия ва ҳаракат фаоллиги бўйича тадбирлар ўтказиб борилади.
Давлат органлари ходимларнинг вакиллик органлари билан ҳамкорликда:
- ташкилот ҳудудида спорт зоналарини ташкил этади;
- спорт тарғиботчилари томонидан ходимлар ўртасида тана вазни индекси ўлчаб борилишини ҳамда ҳар бир ходим бўйича маълумотларнинг hrm.argos.uz платформасига киритиб борилишини таъминлайди.
Давлат хизмати лавозимларига янги тартибда танлов ўтказилади
Давлат хизмати лавозимларини эгаллаш бўйича танлов ўтказишда қуйидагилар белгиланди:
- республика, ҳудудий ва туман (шаҳар) даражасидаги ташкилотлардаги лавозимларнинг бошқарув ва ёрдамчи гуруҳлари учун танловлар фақатгина Давлат фуқаролик хизматчилари вакант лавозимларининг ягона портали орқали ўтказилади;
- қонунчиликда лавозимга тайинлашда тегишли органлар билан келишилиши лозим бўлган лавозимлар бўйича келишув ушбу органларнинг вакилларини танлов комиссияси таркибига киритиш йўли билан амалга оширилади;
- тест синовлари Давлат хизматчиларини синовдан ўтказиш модули орқали махсус жиҳозланган хоналарда ёки масофавий онлайн прокторинг тизими орқали ўтказилади. Бунда тегишли давлат органида тест синовларини махсус жиҳозланган хоналарда ёки масофавий ўтказиш масаласи Давлат хизматини ривожлантириш агентлиги томонидан мурожаатлар таҳлили, ўрганишлар ва сўровномалар натижаларига кўра ҳал этилади;
Иш ўринларини захиралашнинг электрон тизими жорий этилди
“Ягона миллий меҳнат тизими” идоралараро дастурий-аппарат комплексида ногиронлиги бўлган шахслар учун иш ўринларини захиралашнинг электрон тизими жорий этилди. Бунда ташкилотлар томонидан иш ўринларини захиралаш электрон реестр маълумотлари орқали ўзлари жойлашган ҳудуддаги ногиронлиги бўлган шахсларнинг жисмоний ҳолати ва имкониятлари ҳамда малака даражасидан келиб чиқиб амалга оширилади.
Мўғулистондан қўй ва эчки импорт қилган тадбиркорларга имтиёзлар берилади
2027 йил 31 декабргача Мўғулистондан майда шохли молларни Ўзбекистонга импорт қилишда тадбиркорларга қуйидаги имтиёзлар берилади:
- ҳаво транспортида ташиш харажатларининг 50 фоизи давлат бюджети ҳисобидан қоплаб берилади;
- ҚҚСни тўлаш муддатини фоизлар ҳисобланмаган ҳолда тўлов таъминотисиз кечиктириб тўлаш имконияти берилди.
Мебел технологлари малака сертификатларини олиш харажатларининг бир қисми қоплаб берилади
Маҳаллий мебел технологлари учун ривожланган хорижий мамлакатлардаги нуфузли ташкилотларнинг соҳага тегишли бўлган малака сертификатларини олиш харажатларининг 50 фоизи қопланади.
Изоҳ (0)