Англияда 66 ёшли музей ходими йигирма йил мобайнида қимматбаҳо буюмларни ўғирлаб, уларни 60 минг доллардан ортиқ суммага сотгани аниқланди. Бу ҳақда Daily Mail хабар бермоқда.
Маълум қилинишича, Норфолкдаги Gressenhall Farm and Workhouse музейининг собиқ операцион менежери Стивен Харрис экспонатлар тўпламидан тарихий ашёларни ўғирлаганликда айбланмоқда
Прокуратура маълумотларига кўра, у 2005 йилдан 2022 йилгача музей омборхоналарига хизмат йўли орқали кириб, қимматбаҳо экспонатларни, жумладан, сопол буюмлар, шиша идишлар, тангалар ва безакли тарелкаларни ўзлаштирган. Кейинчалик бу буюмлар унинг номидан кимошди уйларида савдога қўйилган
Прокурор Никол Лембнинг айтишича, сотувдан тушган тахминий маблағ камида 60 минг долларни ташкил этган. Шунингдек, Харрис пул ювиш ва фирибгарликда ҳам айбланмоқда. Жумладан, у лотларга эгалик ҳуқуқини даъво қилиб, кимошди ўтказувчиларни чалғитган
Стивеннинг адвокати унинг ҳимоясидаги шахс “айбловларни қатъиян рад этаётганини” билдирган. Айбланувчининг ўзи ҳам барча бандлар бўйича айбини тан олмаган. Музей вакиллари эса тергов давом этаётгани боис изоҳ беришдан бош тортган.
Бундан аввал Париждаги “Гревен” музейидан Франция президенти Эммануэл Макроннинг мум ҳайкали ўғирлаб кетилгани хабар қилинганди.
Изоҳ (0)