Каан Урганжиўғлу — “Севги изтироби” сериалидаги Амир ролини ижро этиб, жаҳон миқёсида танилган истеъдодли турк актёридир. Туркдизи юлдузининг таъкидлашича, аслида у қаҳрамонига мутлақо ўхшамайди.
Каан Урганжиўғлу 1981 йил 8 майда Измирда туғилган. Отаси муваффақиятли тадбиркор бўлган, ўзи эса ёшлигиданоқ иқтисодчи бўлишни орзу қилган. Онаси ва бувиси Каанга болаликдан санъатга муҳаббат уйғотишга уринишган, бироқ бунда катта муваффақиятга эришолмаган.
“Етти ёшимда саҳнага чиққанман. Бувим ва онам менга катта матнни беришди, уни ёдлаб олиб, саҳнага чиқиб айтиб беришим керак эди. Шундай қилиб, саҳнага чиқдим ва ўқий бошладим, кейин онамни кўрдим. Онам ҳам матнни ёдлаб олган экан, менга ёрдам беришга уринаётган эди. Ўша лаҳзада ҳамма нарса чаппасига кетди... Мен бир муддат довдираб қолдим ва микрофонга: “Ойи, жим бўлинг!” деб юбордим. Бир оздан сўнг залда ҳамма кула бошлади”, дея ҳикоя қилади у.
Измирдаги ўрта мактабни тугатгач, Урганжиўғлулар оиласи Америкага кўчиб кетган. 2000 йилда Каан Туркияга қайтиб, Мармара университетига ўқишга кирган, аммо кўп ўтмай молиявий қийинчиликлар туфайли академик таътил олишга мажбур бўлган. Шунга қарамай, у олий маълумотни барибир олган — 2007 йилда дипломли бўлган. Талабалик йилларида қўшимча даромад излаган Урганжиўғлу ўзини моделлик соҳасида синаб кўришга қарор қилган. 2021 йилда уни продюсер Абдулла Ўғуз ўз сериалида суратга тушишга таклиф этган. Илк кинолойиҳанинг ўзидаёқ Каан актёрлик унинг ҳаёт йўли эканлигини тушуниб етган. Айнан шу сабабли у Америкага қайтиб борган ва у ерда Stella Adler Acting & Theatre Academy студияси курсларини тамомлаб келган.
“Мен актёр бўлишимни айтдим, Нью Йоркка кетдим, қайтиб келдим, Қодир Ҳас университетида магистрлик даражасини олдим. Четин Сарикартал билан танишдим. Устоз Четин билан танишганимдан сўнг менда актёрлик ҳақида жиддий фикрлар шакллана бошлади”, дейди у.
Ижоди
Каан Урганжиоғлу 2002 йилда “Қараўғлон” сериалида дебют қилган. 2003 йилда у “Кампус” сериалида Толга ролини ижро этди ва кейинги икки йил давомида ўз актёрлик маҳоратини ошириш ҳамда актёрлик санъати курсларини ўташга бағишлади. 2006 йилда турк актёри яна суртга туша бошлади, бироқ 2011 йилда Беркан ролини ижро этган “Лайли ва Мажнун” сериалидан сўнг танилди.
2013 йилда Каан “Севги” сериалида Жан ролини ижро этди, бир йилдан сўнг эса “Буюк изқувар Филинта” сериалида Отто Петрович образини яратди. 2015 йилда Урганжиоғлига “Севги изтироби” сериалида Амир роли таклиф қилинди. Актёр сценарийни синчиклаб ўрганиб, узоқ ўйлагач, розилик берди. Айнан шу сериал уни жаҳон миқёсида машҳур қилиб, ҳақиқий туркдизи юлдузига айлантирди. Каан ўз қаҳрамони ҳақида шундай ҳикоя қилган эди:
“Амир қилаётган ҳеч бир ишидан завқ олмайди, унинг ҳаёти мураккаб. Ҳаммамизнинг ҳаётимиз мураккаб, эҳтимол шу туфайли унга ҳамдардлик билдирамиз. Ёмон одамларнинг ўзига хос жиҳати - бу уларнинг кулгиси, улар қилаётган ёвузликларидан лаззатланади. Амир танганинг бошқа томонида жуда яхши одам бўлиши мумкинлигини, шароитлар уни шу ҳолатга олиб келганини ўйлайди. У мураккаб ҳаёт кечиришда давом этмоқда”.
Актёрнинг кейинги карьераси муваффақиятли ривожлана бошлади. У Американинг “Жек Райн” сериалида Денизни, “Нореаллик” фильмида Муратни ва “Севги 101” кўп қисмли фильмида Камолни ижро этди. Бу роллар унга Амир образидан халос бўлишга ёрдам берди. Узоқ вақт давомида турк сериали мухлислари Каанни ҳақиқий ҳаётда ҳам худди ўзи ўйнаган қаҳрамон каби шафқатсиз ва хавфли одам деб ўйлашарди.
“Ҳа, менда совуққонлик бор, лекин ундан фойдаланмасликка ҳаракат қиламан... Болаликдан бизда айрим туйғулар, масалан, айбдорлик ёки керакcизлик ҳисси яширинган бўлиши мумкин. Ҳаммамизда шундай бўлади, кейин эса бу ҳис-туйғуларга катта ёшда кундалик муаммолар қўшилади”, деган эди у ўзи ҳақида.
2021 йилда Каан дунёнинг кўплаб мамлакатларида ҳақиқий ҳитга айланган “Адолат” кўп қисмли фильмида Илғоз ролини ижро этишга тасдиқланди. Ушбу сериалда суратга тушиш билан бир пайтда, актёр “Ишончли қўлларда”, “Fortuna операцияси: Ғалаба қозониш санъати”, “Чақирув”, “Ишончли қўлларда 2” каби лойиҳаларда ҳам рол ўйнади.
Шахсий ҳаёти
2016 йилда Каан Урганжиўғлу Зейнеп Ўмак билан унаштирилганини оммага эълон қилди. У кейинги йил никоҳдан ўтишларини айтган бўлса-да, бу воқеа содир бўлмади. Бироқ 2023 йилнинг ёзида турк актёри севгилиси Буржу Денизер билан турмуш қурди ва шу йилнинг декабрь ойида улар ўғил фарзандли бўлишди. Болага Ардуч деб исм қўйишди.
Урганжиўғлу шахсий ҳаёти ҳақида кўп гапирмайди — у чинакам бахт оммага ошкор қилинишга муҳтож эмаслигига ишонади. Актёр баъзан ўғли ва рафиқаси билан тушган суратларини ижтимоий тармоқдаги саҳифасига жойлаштиради. Аммо барча суҳбатларида у доимо Буржунинг ёнида ҳақиқий бахтни ҳис этганини таъкидлайди.
Каан Урганжиўғлу ҳозирда
Бугунги кунда турдизи юлдузи ҳаётининг барча жабҳаларида муваффақиятларга эришмоқда. У талаб юқори, машҳур ва юқори маош оладиган актёр, бахтли эр ҳамда ажойиб ота бўлишга муваффақ бўлди. Каан ишдан бўш вақтининг барчасини оиласи даврасида ўтказади. Турк актёри мунтазам равишда спорт залига қатнайди, соғлом овқатланишга ҳаракат қилади, балиқ овлашни яхши кўради ва кўп вақтини табиат қўйнида ўтказади.
Кааннинг энг эзгу орзуси — ўғлига муносиб намуна бўлишдир. Урганжиўғлу нафақат орзуларга ишониш, балки уларни амалга ошириш учун барча имкониятлардан фойдаланиш кераклигига ишонади. Унинг фикрича, ўзини бағишлаш, меҳнатсеварлик ва танланган касбга садоқат — булар доимо муваффақиятга эришиш имконини берадиган омиллардир.
Изоҳ (0)