Францияда бўлиб ўтган концертда афсонавий поп мусиқа қироли Майкл Жексон кийган бир дона ялтироқ пайпоқ 8 минг доллардан кўпроқ пулга сотилди, дея хабар берди TRT Global. Хонанда уни 1997 йилдаги “Тарихий жаҳон турне сафари” давомида кийган.
Жексон махсус безакли бу пайпоқни “Billie Jean” номли қўшиғи ижро пайтида кийган. Жанубий Франциянинг Ним шаҳрида бўлиб ўтган концертдан сўнг техник ходимлардан бири пайпоқни хонанда гардероби яқинида топиб олган ва ўзи билан олиб кетган. Орадан ўнлаб йиллар ўтгач, пайпоқ доғларга тўлган, безаклар ва тошлар эса сарғайиб кетган бўлса-да, кимошди савдосида ашаддий мухлислар томонидан сотиб олинган.
Аввалроқ 2009 йилда Макао шаҳридаги курортдаги қиморхонада Майкл Жексонга тегишли ялтироқ қўлқоп 350 минг долларга сотилган эди. Хонанда уни 1983 йилда илк бор “Ой юриши” рақсини ижро этган пайтда таққан эди. Бундан ташқари, 2023 йилда Парижда Жексонга тегишли шляпа 80 минг доллардан ортиқ нархга сотилган.
Майкл Жексон (1958–2009) америкалик қўшиқчи, раққос, бастакор ва продюсер, замонавий поп мусиқасининг энг йирик намоёндаларидан бири. У 5 ёшидан экранларга чиқа бошлаган ва The Jackson 5 гуруҳи таркибида танилган. 1980 йиллардан бошлаб яккахон фаолиятида улкан муваффақиятларга эришган.
Унинг Thriller альбоми мусиқа тарихидаги энг кўп сотилган альбом ҳисобланади. Billie Jean, Beat It, Bad, Smooth Criminal, Black or White каби қўшиқлари мусиқа саноатида инқилоб ясаган. Саҳнадаги ўзига хос услуби, хусусан, “Ой юриши” рақси бутун дунёга машҳур бўлган Жексон 13 марта “Гремми” мукофоти соҳиби бўлган. Уни ҳануз “Поп қироли” деб атаб келишмоқда.
Изоҳ (0)