Ўзбекистон Президенти администрацияси фармойиши билан икки департамент бошлиғига ўринбосарлар тайинланди. Бу ҳақда 31 июль куни президент матбуот котиби Шерзод Асадов хабар берди.
Ҳикматилла Убайдуллаев Президент администрацияси Молиявий технологиялар, рақамлаштириш ва сунъий интеллект бўйича департаменти бошлиғи ўринбосари лавозимига тайинланди.
Элмурод Нажимов Креатив иқтисодиёт ва туризм бўйича департаменти бошлиғи ўринбосари бўлди.
Маълумот учун, Ҳикматилла Убайдуллаев стратегик коммуникациялар, рақамли технологиялар ва сунъий интеллект соҳасида мутахассис ҳисобланади. У генератив сунъий интеллект, таълим ва маълумотларни автоматлаштириш ҳамда таҳлил қилиш соҳасидаги амалий ечимлар кесишмасида лойиҳаларни амалга оширувчи хусусий лаборатория — AIМ Лабънинг асосчиси ва раҳбаридир.
Убайдуллаев илгари Президент администрацияси тузилмаларида раҳбарлик лавозимларини эгаллаган. Хусусан, Президент администрацияси ҳузуридаги Ахборот ва оммавий коммуникациялар агентлиги матбуот хизматига раҳбарлик қилган, шунингдек, Миллий оммавий ахборот воситаларини қўллаб-қувватлаш ва ривожлантириш жамоат фонди матбуот котиби лавозимида ишлаган. 2022—2023 йилларда Президент администрациясида АКТ ва жамоат лойиҳалари бўйича етакчи маслаҳатчи вазифасини бажарган.
Ҳикматилла Убайдуллаев жорий йил 2 июлдан бошлаб Марказий Осиё сунъий интеллект ассоциацияси (AICА) ижрочи директори вазифасини бажарувчи этиб тайинланганди.
Изоҳ (0)