“Беш йилдан буён фарзандсизман” — Талъат Йўлдошев аёли бошқага уйланишни таклиф қилгани ҳақида гапирди (видео)

Актёр Талъат Йўлдошев YouTube’даги “Дарё лифестайле” каналига берган интервьюсида аёлидан миннатдорлиги ва фарзандсизлик билан синалаётгани ҳақида гапирди.

“Аёлим актёр эканлигимни билмаган”

— Аёлим билан танишувимиз жуда қизиқ кечган. Фарғонага гастролга борганимизда уни учратиб қолганман. У пайтларда ўзимни жуда таниқли инсон деб билардим. Аёлимнинг “Нима иш қиласиз?”, деган гапи мени эсанкиратиб қўйган. Нима дейишни билмай ўзимни футболчи деб таништирганман. Муносабатлар жиддийлашиб, уйига совчи жўнатишимга яқин суратимни укасига кўрсатиб “Бу футболчини танийсанми?”, деб сўрабди. Қайним эса “Нефтчи” жамоасида тўп сурадиган футболчи экан. Қайним кулиб, мени актёр эканимни айтган. Шундан кейин аёлим ҳақиқатни билган, дейди Талъат Йўлдошев.

“Уйимга нон олиб киролмаган кунларим бўлган”

— Баъзи одамларнинг қийинчиликлари ҳақида эшитиб, кулиб қўяман. Агар қийинчилик учун инсон руҳий тушкунликка тушиши керак бўлса, мен аллақачон ўзимни осмондан отиб юборишим керак экан. Яширмайман, менинг рўзғоримда ҳам ҳар хил вазиятлар бўлиб туради. Шундай пайтлар ҳам бўлганки, одамлар қанчалик танишмасин, уйимга иккита нон олиб киролмайдиган вазиятларга тушиб қолганман. Аёлим аслида кимёгар, аммо бир неча йилдан буён онлайн дўкон юритади. Биласизми, эркак киши учун энг қийини, пулсиз қолганингизни билиб, аёлингиз “Мана буни ишлатиб туринг ёки бунга рўзғорлик қилиб келинг”, дегани бўлса керак. Мана шундай вазиятлар мени руҳан қийнайди. Оилам-ку, қийинчиликларда етарлича тобланган, аммо аёлимни ҳам қийнаяпман деб ўзимни қийнайман.

“Яратган бизни фарзандсизлик билан синаяпти”

— Яратган мени болаликдан то шу кунгача синаган. Бундан ҳеч қачон нолимайман ва тушкунликка ҳам тушиб қолмайман. Бунинг ажрини беришига ишонаман. Кўп давраларда “Фарзандлардан нечта?”, деб сўрашса нима дейишимни билмай қоламан. Бу ҳам бир синов, қўлимиздан нима ҳам келарди?! Яратган бизни фарзандсизлик билан синаяпти. Бир неча кун аввал ҳам аёлим “Бошқа аёлга уйланиб фарзанд кўринг, умрингизни хазон қилманг”, деди. Бу гапни гапириш аёл кишига қанчалик оғирлигини биламан. Менга ҳам кўпчилик шундай маслаҳат берган. Хўп, мен оила қуриб фарзандли бўларман, аммо аёлимнинг аҳволи нима кечади? Менинг кўнглимга икки аёл сиғмайди. Баъзан ўйлаб қоламан, болалигимдан Самандар Ҳамроқуловга ҳавас қилиб, уни ғойибона устозим деб билардим. Шу инсон ҳам 15 йил деганда фарзандли бўлди, демак сабр қилсак Яратган бизга ҳам беради, дейди Талъат Йўлдошев.

Суҳбатни тўлиқ ҳолда қуйида томоша қилишингиз мумкин.