Яқинда Coldplay гуруҳининг концертида юз берган ҳолат ижтимоий тармоқларда яшиндек тарқалди. Миллиардер Энди Байрон шоуга рафиқаси эмас, балки севгилиси — кадрлар бўлими раҳбари Кристин Кабот билан ташриф буюрди. Бу “саргузашт” сирлигича қолиши мумкин эди, аммо концерт пайтида тасодифан жуфтлик камерга тушиб қолди ва бир-бирини қучоқлаб турган вақтида жонли эфирда кўрсатилди.
Видеоролик қисқа фурсатда тарқалиб, миллионлаб марта томоша қилинди. Натижада Байрон нафақат ишидан, балки оиласидан ҳам айрилди — унинг рафиқаси ажрим учун ариза берди. Худди шундай тақдир Кристин Каботни ҳам кутмоқда: эри бундай очиқ-ойдин хиёнатни кечира олмади. Бутун дунёга маълум бўлган ушбу воқеа ўтмишда жамоатчилик эътиборини тортган бошқа йирик можароларни ҳам эслатиб юборди. Қуйида хиёнати қимматга тушган уч нафар миллиардер ҳақида сўз боради.
Билл Гейтс — 27 йиллик никоҳнинг тугашига сабаб бўлган хиёнат
Фото: The Day
Microsoft асосчиси Билл Гейтс узоқ йиллар намунали оила бошлиғи сифатида кўрилган. Унинг Мелинда Френч билан ришталари мустаҳкамдек туюлган, аммо 2021 йил улар ажрашганини эълон қилди. Расмий сабаби очиқланмаган бўлса-да, ОАВ орадан кўп ўтмай бунинг тагига етди.
Маълум бўлишича, Гейтс 2000 йилларда Microsoftʼдаги бир ходим билан яқин муносабатда бўлган. Орадан йиллар ўтиб, 2020 йилда ўша аёл компания директорлар кенгашига хат йўллаб, бўлган воқеаларни баён этган. Аёл Гейтснинг рафиқаси Мелиндага ҳам бу ҳақда хабар етказиш кераклигини талаб қилган. Орадан кўп ўтмай, жуфтлик ажрашган, чунки Мелинда бу муносабатни кечира олмаган.
Ажрим Гейтсга 5 миллиард долларга тушди. Молиявий йўқотишдан ташқари, унинг обрўси ҳам жабр кўрди.
Илон Маск: тугамас севги можаролари ва сир тутиладиган фарзандлар
Фото: The Day
Tesla ва SpaceX раҳбари Илон Маск доимий равишда ОАВ диққат марказида бўлган. Унинг шахсий ҳаёти эса тартибсизлик ва можаро билан тўла. 2022 йилда Business Insider журнали Neuralink компанияси операцион директори Шивон Зилисдан Маскнинг фарзанди борлигини фош қилди. Бу ҳолат бир йилдан ортиқ яширилган эди.
Қизиғи шундаки, ўша пайтда Маск расмий равишда хонанда Граймс билан муносабатда эканини яширмаган эди. Улар аллақачон бир ўғил ва суррогат она орқали туғилган қизни бирга тарбиялаётганди. Демак, Маск деярли бир вақтда икки аёлдан фарзанд кўрган. Граймс бу ҳақда матбуотдан билиб қолганини айтди. Маск унга “Ер аҳолисини кўпайтириш” ниятида бўлганини айтиб ўзини оқлади.
Фото: The Day
Ушбу воқеани яшириш учун Маск Зилисга миллионлаб доллар тўлаган, болага нисбатан оталик маълумотларини ўзгартириш мақсадида судга ҳам мурожаат қилган. Аммо ҳужжатлар ОАВга сизиб чиққан. Граймс эса ниҳоят Маск билан бутунлай ажрашиб, 2023 йилда алимент талаб қилган.
Расмий маълумотларга кўра, Илон Маск 4 аёлдан 14 фарзанднинг отаси, бироқ The Wall Street Journalʼнинг янги текшируви Қўшма Штатлар жамоатчилигини ларзага солди: аслида Маск ворисларнинг бутун бир “легиони”га эга бўлишга улгурган экан.
Миллиардер бугунги кундаги энг муҳим муаммо сифатида туғилиш даражасининг пасайишини кўрмоқда. У ўзини пронатализм тарафдорлари сафида эканини очиқ тан олади — улар ушбу муаммонинг сиёсий ва маданий ечимларини амалга оширишга интилаётган кишилардир.
Маскнинг нечта фарзанди борлиги аниқ эмас. The Wall Street Journalʼнинг яқин доиралари ва аноним манбалари 14 рақами анча камайтириб кўрсатилган, деб таъкидламоқда.
Жефф Безос: журналистлар томонидан фош этилган хиёнат ва жуда қимматга тушган ажрим
Amazon асосчиси Жефф Безоснинг хиёнати 2019 йил январида National Enquirer томонидан фош этилди. Нашр унинг собиқ Fox News бошловчиси Лорен Санчес билан бўлган хатларини қўлга киритди.
Санчес таниқли продюсер Патрик Уайтселга турмушга чиққан эди. Безос билан у 8 ой давомида яширин учрашувларда бўлган, хусусан, махфий саёҳатлар ва ҳашаматли виллаларда вақт ўтказган. Бу вақтда Безос Маккензи Скотт билан қонуний никоҳда бўлгани жамоатчилик танқидига сабаб бўлган
Ажрим жараёнида Маккензи кутилмаганда ўзини оғир ва вазмин тутди. Безос атиги уч ой ичида молиявий келишувга эришди. Маккензи Amazon акцияларининг 4 фоизини олиб, 38 миллиард долларга эга бўлди, бироқ компания барқарорлиги учун назорат пакетини Безосда қолдирди.
Сўнг 2021 йилда Безос Amazon бош директорлигидан кетди ва бу қарорини “янги лойиҳаларга эътибор қаратиш” деб изоҳлади, бироқ кўпчилик буни жамоатчилик босимига боғлади. Унинг Blue Origin компанияси ҳам танқид остида қолган эди.
Узоқ йиллик “соддадил ва ишчан тиришқоқ миллиардер” образи қулаб тушди. У мемлар ва кинояли материалларнинг асосий қаҳрамонига айланди. 2023 йилда Санчес уларнинг романи Безос ҳали ажрашмаган вақтда бошланганини тан олди — бу эса ҳолатни янада салбий тусга келтирди.
Улар яқинда ҳашаматли тўй қилишди, аммо жамоатчиликдаги салбий кайфият ҳанузгача изсиз кетгани йўқ. Amazonʼнинг собиқ ходимлари ҳатто Безосга нисбатан корпоратив ахлоқни бузганликда айблаб судга мурожаат қилишди.
Изоҳ (0)