Американинг Disney компанияси ажойиб мультфильмлари билан бутун дунёда машҳур бўлиб, томошабинларнинг бир неча авлоди улар билан улғайган. Бу АҚШда биринчи бўлиб тўлиқ метражли анимацион фильм суратга олган ва ишлаб чиқаришга ротоскопия техникасини жорий этган дастлабки компаниялардан бири. Тасвир яратишнинг бу усулида жонли актёрлар иштирокидаги саҳна суратга олинади, сўнгра у кадрма-кадр қайта чизилади. Актёрларнинг ҳаракатлари ва юз ифодаларини аниқроқ тасвирлаш имконини берувчи бу ёндашув компанияда 80 йилларнинг охиригача қўлланилган.
Мультфильмларни бу усулда яратиш жуда катта меҳнат талаб қилар ва қиммат жараён эди. Салбий қаҳрамонлар образи эса кўпинча умумлаштирилган кўринишда бўлган. Бунда машҳур санъаткорлар ёки улар яратган кинофильм қаҳрамонлари мултипликацион персонажларга асос бўлган.
Қиролича Гримхилда
1937 йилда экранларга чиққан “Оппоғой ва етти гном” мультфильми ҳақиқий сенсацияга айланди. У ғоят катта тижорат муваффақиятига эришди ва анимация ривожланишига улкан таъсир кўрсатди. Ушбу фильм Walt Disney’га саккизта “Оскар” мукофотини келтирди.
Фильмнинг асосий салбий қаҳрамони Оппоғойнинг ўгай онаси, ёвуз малика Гримхилддир. У энг гўзал бўлиб қолишни истайди, шу мақсадда ўгай қизини йўқ қилишга тайёр. Дастлаб у семиз ва ақлдан озганроқ бўлиши керак эди, аммо кейинчалик аниматорлар уни салобатли ва ҳукмрон, айни пайтда гўзалликдан бебаҳра бўлмаган аёлга айлантиришади.
Оппоғой ва шаҳзода ротоскопия технологияси ёрдамида яратилган бўлса-да, малика образини муайян актриса асосида чизишнинг иложи бўлмаган. Аниматор Артур Беббит 1935 йилдаги “У” мелодрамасидаги Ҳелен Гаҳагандан илҳом олган. Маликанинг нафрат билан қимтилган лаблари ва катта кўзлари Жоан Кроуфорддан олинган. Бундан ташқари, қаҳрамонда Марлен Дитрих, Грета Гарбо ва қисман маликага овоз берган Люсил Ла Верннинг хусусиятлари ҳам акс этган.
Капитан Ҳук
Жеймс Баррининг машҳур песаси асосида яратилган “Питер Пен” мультфильмида болаларга капитан Ҳук раҳбарлигидаги қароқчилар қарши туради. Башанг кийинган, аммо қонхўр капитан Питер Пендан илгари кесилган қўли учун ўч олишни истайди.
Капитан Ҳукнинг аниматори Фрэнк Томас бўлиб, у “Тўққиз қария” деб аталган тор доирадаги аниматор-рассомлар гуруҳига кирарди. Улар ХХ асрнинг катта қисмини Disney студиясида ўтказишган. Қаҳрамонга овоз берган Ганс Конрид кинода кўп суратга тушмаган бўлса-да, 1940 йилларнинг охирида кўплаб радиоспектакллари орқали Америка тингловчиларига яхши таниш эди.
Конрид икки йилдан ортиқ вақт давомида ротоскопия усули билан унинг қаҳрамонини чизиш учун модел вазифасини бажарган. Бундан ташқари, Жон, Майкл ва Венди Дарлингларнинг отасига ҳам овоз берган.
Круэлла де Вил
Мўйнали буюмларга ўч Круэлла де Вил 1961 йилда яратилган “101 далматин” тўлиқ метражли анимацион фильмининг ёвуз қаҳрамони ҳисобланади. У эски таниши Анитада кўрган кичкина далматинлар терисидан пўстин тикишни орзу қилади. Бу мақсадда у иккита фирибгарни ёллайди, улар эса кучукчаларни ўғирлашади.
Круэллага овоз берган америкалик актриса Бетти Лу Жерсон радиоспектакллар орқали машҳур бўлиб, шунингдек, 1950 йилдаги Disney’нинг “Золушкал мультфильмида ҳикоя матнини ўқиган. Жерсон нафақат Круэллага овоз берган, балки бу персонажни яратишга масъул бўлган студиянинг етакчи аниматори Марк Дэвис учун илҳом манбаларидан бири бўлиб хизмат қилган.
Марк Дэвисга илҳом берган яна бир актриса унинг фамилиядоши Бетт Дэвис эди. Голливуднинг олтин даври энг буюк актрисаларидан бири сифатида у кўплаб ёқимсиз қаҳрамонларни гавдалантириши билан шуҳрат қозонган. Бундан ташқари, Круэлла образига, аниқроғи, унинг муштук билан ўйнаш услубига машҳур актриса ва ашаддий чекувчи Таллула Бенхед ўз ҳиссасини қўшган.
Скар
Disneyнинг энг жирканч ёвуз қаҳрамонларидан бири “Қирол шер” мультфильмидаги Скар бўлади. Муфасанинг маккор, ҳасадгўй ва ҳокимиятпараст укаси шоҳнинг ўлимини уюштиради ва жияни Симбани подшоликдан қувиб, ўзи қирол бўлиб олади.
Скар ролини ижро этиш учун кўплаб актёрлар синовдан ўтказилган. Улар орасида “У” даҳшатли фильмидаги масхарабоз ролини ижро этган Тим Карри, “Гарри Поттер” орқали таниш бўлган Алан Рикман, Иэн МакКеллен ва бошқалар бор эди. Натижада ғалаба Жереми Айронсга насиб этди.
Аниматор Андреас Дежа Жереми Айронснинг мимикасини синчковлик билан кузатиб, уни экранга моҳирона кўчирган. Бироқ актёр ўз қаҳрамонидан қониқмаган, аммо бунинг ўзига хос сабаби бор эди. Унинг фикрича, Скар қандайдир озғин ва бечораҳол қилиб тасвирланган, ваҳоланки, сочини олдириб юрувчи Жеймс Эрл Жонснинг Муфаса қаҳрамони ҳашаматли ёли билан мақтана оларди.
Изоҳ (0)