Концерт вақтида машҳурлар ҳаётига таҳдид солган кутилмаган ҳодисалар (видео)

Машҳур санъаткорлар иштирокидаги айрим концертларда фавқулодда вазиятлар юз берган ва ҳатто баъзиларининг ҳаёти хавф остида қолган. Қуйида машҳурлар саҳнада дуч келган кутилмаган ҳодисаларни ёдга оламиз.

Бейонсе

Cоwboy Carter гастрол сафари доирасида Бейонсе кабриолетда томошабинлар устидан учиб ўтаётган эди, аммо тўсатдан машина қулай бошлади. Қўшиқчининг жамоаси уни ерга тушириш билан овора бўлиб турган бир пайтда, Бейонсе қўшиқ айтишда давом этди. Кейинги концертларда эса кабриолетни катта сунъий отга алмаштиришди.

Кэти Перри

Австралиядаги Lifetimes Tour концертларидан бири Кэти Перри ва унинг мухлислари учун фожиа билан якунланиши мумкин эди. Хонанда зал бўйлаб учадиган шарнинг ичидан тушиб кетишига бир бахя қолди. Яхшиямки, бу ҳодиса ерга қўнишга бир оз қолганда содир бўлди ва Кэти тезда саҳнага қайтишга муваффақ бўлди.

Оливия Родриго

Хавф фақат саҳна устида эмас, остида ҳам бўлиши мумкин. Буни Оливия Родриго ўз концертида бошидан кечирди. Австралиянинг Мелбурн шаҳридаги шоу пайтида у мухлисларни қутлаётган маҳал техник чуқурликка тушиб кетди. Сўнг у “Ҳечқиси йўқ, мен яхшиман”, дея дарҳол мухлисларини тинчлантирди ва концерт дастурини давом эттирди.

Тhе Weeknd

Бир неча йил аввал Тhе Weeknd Мехикода Party Monster қўшиғи ижро этаётган вақтда саҳнадаги декорация хонандадан атиги бир неча сантиметр узоқликда қулаб тушди. Хонанда ҳатто буни дарҳол пайқамади, аммо концертдан сўнг ушбу воқеа видеосини ижтимоий тармоқларда баҳам кўрди.

Ака-ука Жонаслар

2024 йилда Прагада ўтказилган концертда ака-ука Жонасларни мухлислардан бири жиддий қўрқитди. У саҳнага лазер олиб кирди ва уни санъаткорларга тутиб турди. Ник Жонас бу ҳолатни кўриб, дарҳол хавфсиради ва саҳнани тарк этди. Сўнг хонанда хавфсизлик ходимларига хабар берди. Бундай “ҳазиллар” албатта оқибатсиз қолмайди.

Билли Айлиш

Хонанданинг Нью Йоркдаги Hit Me Hard and Soft концерт дастури якунланаётган эди. Аммо Билли Айлиш саҳнани чиройли тарзда тарк эта олмади — охирги зинапояда тойиб кетди. Орадан бир оз вақт ўтиб Билли мухлисларига улкан кўкарган жойини кўрсатди. Аммо бундай йиқилиш бошқача якун топиши мумкин эди.