“Калмар ўйини” сериалида визуал образларнинг аҳамияти катта. Ҳатто кийим ранглари ҳам сюжетда муҳим рол ўйнайди ва улар бежиз танланмаган. Ранглар нафақат ўйин иштирокчисининг қайси тоифага мансублигини кўрсатади, балки чуқур маънони билдиради.
Сериалда ўйинчилар яшил спорт кийимида, қўриқчилар эса қизил ниқобли формада тасвирланган. Ҳалок бўлган иштирокчилар эса қора тобутларга жойланиб, усти пушти тасма билан боғланган. Улар нимани англатади?
Яшил ранг: итоат, умид ва 80 йиллар спорт кийими
Ўйин иштирокчиларининг кийими яшил рангда. Жанубий Кореяда бу ранг одатда умид туйғусини ифодалайди, аммо бу сериал контекстида кинояга айланади. Чунки ўйиндан одамлар омон қолиши амримаҳол.
Яшил форма мактаб ёки интернатдаги тарбияланувчилар кийимини эслатади. Бу орқали қаҳрамонлар болалик ҳолатига қайтарилади: улар қарзлари кўп бўлгани сабабли умидсизлик домига тушган ва “катталар”га қарам бўлиб қолгандек гўё.
Қизил: назорат, ҳокимият ва хатар белгиси
Қўриқчилар ёрқин қизил — тўқ пушти либос кийишган. Корейс маданиятида бу ранг куч, ҳаёт ва айни пайтда бир оз агрессияни билдиради. Сериалда эса бу ранг огоҳлантирувчи сигнал бўлиб хизмат қилади: “хавф”, “яқинлашманг”, “огоҳ бўлинг”.
Қўриқчиларнинг на юзи, на исми бор, уларни фақат ниқобдаги белгилари ажратиб туради. Улар худди компьютер ўйинидаги душман каби инсонийликдан холи шахслардир.
Қора тобутлар ва пушти боғич: “худо”нинг совғаси
Сериалдаги энг ваҳимали тасвирлардан бири ўйин иштирокчилари учун тайёрланган тобутлардир. Улар қора рангда бўлиб, устига ёрқин пушти тасма боғланган. Сериалда тобутлар худди байрамона совға қутисига ўхшаш тарзда тузилган. “Калмар ўйини” бадиий раҳбар Че Кён Соннинг сўзларига кўра, бу дизайн ўйин яратувчисининг қандай фикрлашини акс эттиради.
“Ўйин бошқарувчилари ўзларини худодек тасаввур қилади ва иштирокчиларга имконият ато этаётган илоҳий куч сифатида билади”, дейди Че Кён Сон.
Сериалда ҳатто ўлим ҳам шоу элементига айлантирилган. Бу худди VIP мижозлар учун кўрсатилаётган хизматдек кўрсатилган.
Нега айнан пушти боғич?
Сериал режиссёри Ҳван Дон Хёк буни қуйидагича изоҳлади:
“Сериалда асосий ранглар қора ва пушти. Мен эса боғични танлашда Blackpink гуруҳининг образидан илҳомландим”, деди у.
Изоҳ (0)