Бугун, 28 июль куни Туркиянинг Истанбул шаҳридан Тошкент шаҳрига учаётган самолётда техник носозлик юзага келган. Бу ҳақда Uzbekistan Airways хабар берди.
Маълум қилинишича, HY272 рейсини бажараётган самолёт ҳавога кўтарилган. Орадан 1 соат ўтиб, ҳаво кемасининг сигнализация тизими ишга тушган. Тизим салон ва кабинадаги босимнинг беқарорлиги ҳақида сигнал берган.
“Парвоз хавфсизлигини таъминлаш мақсадида ҳаво кемаси командири самолётни жўнаш аэропортига қайтариш тўғрисида қарор қабул қилди. Маҳаллий вақт билан 15:50 да самолёт Истанбул аэропортига муваффақиятли қўнди. Авиакомпаниянинг техник хизматлари ҳаво кемасини Тошкентдаги базага қайтариш бўйича зарур чораларни кўрмоқда. Ушбу рейс йўловчилари захира ҳаво кемаси орқали Тошкентга етказилади ва кутиш даврида меҳмонхонага жойлаштирилади”, дейилади манба хабарида.
Авиакомпания ахборотига кўра, йўловчилар Истанбулдан 29 июль куни маҳаллий вақт билан соат 07:30 да учиб, Тошкентга соат 13:35 да етиб келади.
Изоҳ (0)