UFC енгил вазн тоифасининг (-70 кг) собиқ чемпиони, 33 ёшли россиялик аралаш жанг санъати устаси Ислом Махачев кейинги жанги бўйича деярли келишувга эришилганини маълум қилди. Бу ҳақда Championat нашри хабар берди.
Кейинги жанг бўйича 90 фоиз келишувга эришилган. Эҳтимол, бу баҳс ноябрь ойида бўлиб ўтиши мумкин, — деди Махачев UFC матбуот хизматига берган интервьюсида.
Махачев сўнгги жангини 2025 йил 18 январь куни, UFC 311 турнири доирасида ўтказган эди. Калифорниянинг Лос-Анжелес шаҳрида ўтган кечада у бразилиялик Ренато Мойканога қарши октагонга чиқиб, рақибини биринчи раунддаёқ бўғиш усули (submission) билан мағлубиятга учратди ва енгил вазн тоифасида ўз камарини тўртинчи марта ҳимоя қилди. Махачев 2025 йил июнь ойида ўз камарини вакант қолдириб, вазн ўзгартиришини маълум қилди.
Махачевнинг ноябрь ойидаги жанги кимга қарши бўлиши ҳозирча расман эълон қилинмаган. Бироқ турли нашрлар бу жангда рақиб австралиялик Жек Делла Маддалена бўлиши мумкинлигини тахмин қилмоқда. Сабаби Маддалена ўз вазн тоифасида чемпионликни қўлга киритганидан сўнг, Махачевни очиқчасига жангга чақирган эди. Доғистонлик спортчи эса бунга:
Икки вазн тоифасида чемпион бўлиш вақти келди, — дея жавоб берган.
Шундан кейин уларнинг эҳтимолий жанги UFC мухлислари орасида катта қизиқиш уйғотиб келмоқда.
Маълумот учун, Жек Делла Маддалена UFC’нинг ярим ўрта вазн (-77) тоифасида жанг қилади.
Изоҳ (0)