Австрияда Вена–Гамбург йўналишида ҳаракатланаётган ICE 90 Deutsche Bahn тезюрар поезди 26 июль куни техник носозлик сабабли туннелда тўхтаб қолди. Ҳодиса оқибатида тахминан 400 нафар йўловчи 6 соат давомида қоронғи ва иссиқ туннелда қолиб кетди. Бу ҳақда Deutsche Welle хабар берди.
Маълумотларга кўра, поезд ҳаракатланишни бошлаганидан 15 дақиқа ўтгач, маҳаллий вақт билан 13:30 атрофида тўхтаб қолган. Поезднинг электр тармоғига уланган пантографи носозликка учраган, шу сабабли вагонлар электрдан узилиб қолган.
Йўловчилар захира поездга кўчирилган, сўнгра улар автобуслар билан Венага етказилган. Эвакуация пайтида айрим йўловчилар огоҳлантиришларга қарамай, ўз ҳолича вагонларни тарк этган. Қидирув-қутқарув ишларига 100 дан ортиқ қутқарувчи жалб қилинган. Мутахассислар хавфсизлик нуқтайи назаридан туннелдаги электр таъминотини вақтинча ўчиришга мажбур бўлган. Бу эса эвакуацияни янада чўзиб юборган.
Ҳодиса жойида 2 нафар йўловчига тиббий ёрдам кўрсатилган, аммо уларни касалхонага ётқизишга тўғри келмаган. Ушбу воқеа сабабли Венадан жўнаб кетаётган бошқа поездлар ҳам кечиктирилган.
Изоҳ (0)