Саудия Арабистонининг кучли клубларидан бири — “Ан-Насср” 25 ёшли португалиялик ҳужумчи Жоау Феликсни харид қилиш бўйича “Челси” билан музокараларни якунлаш арафасида турибди. Бу ҳақда инсайдер Фабрицио Романо ўзининг ижтимоий тармоқдаги саҳифаси орқали маълум қилди.
Манбага кўра, “Ан-Насср” Феликснинг трансфери юзасидан расмий таклиф юборган ва футболчининг ўзига ҳам аниқ шартнома таклиф қилган. Музокаралар фаол давом этмоқда. Унга кўра, томонлар яқин 24–48 соат ичида келишувга эришиши мумкин.
Аввалроқ Феликс ўзининг собиқ клуби — “Бенфика”га қайтиши мумкинлиги ҳақида хабарлар тарқалган эди. Португалия клуби “Челси” билан деярли келишувга эришган бўлса-да, молиявий омиллар ҳамда Криштиану Роналду билан бир жамоада тўп суриш истаги футболчининг қарорига таъсир қилган.
Жоау Феликс 2015 йилдан 2019 йилгача “Бенфика” тизимида тўп сурган. 2019 йилда у 127,5 миллион евро эвазига “Атлетико Мадрид”га ўтган, бироқ Диэго Симеоне қўл остида мунтазам ўйин амалиётига эга бўла олмади. Сўнгги йилларда у “Барселона” ва “Милан” жамоаларида ижарада ҳаракат қилди. Ўтган мавсумнинг иккинчи ярмида “Милан” сафида 21 учрашувда қатнашиб 3 та гол муаллифига айланган. Transfermarkt портали ҳозирда Феликснинг трансфер қийматини 20 миллион евро деб баҳоламоқда.
Изоҳ (0)