Енгил вазн тоифасида UFC чемпионлиги камарига эга, ҳали мағлубият нима эканлигини билмаган 28 ёшли испан-грузин жангчи Илия Топурия ўзининг навбатдаги потенциал рақиби ҳақида фикр билдирди. Бу ҳақда Championat нашри хабар берди.
Унга кўра, агар австралиялик Жек Делла Маддалена россиялик Ислом Махачевни мағлуб этса, у билан жанг қилишга тайёр экан:
Тасаввур қилинг, агар Жек Исломни енгса, унда мен Маддалена билан жанг қилган бўлардим, — дея Топурия сўзларини келтиради Фулл Сенд MMA нашри.
Маълумот ўрнида, Ислом Махачев ҳамда Жек Делла Маддалена ўртасидаги жанг ҳали белгиланмаган, аммо австралиялик спортчи ўз вазн тоифасида фаластинлик Билол Муҳаммадни ҳакамларнинг якдил қарори билан мағлуб этиб, чемпионга айланиши билан дарҳол Ислом Махачевни октагонга чақирди. Доғистонлик спортчи эса “икки вазн тоифасида чемпион бўлиш вақти келди”, дея жавоб берди. Мазкур спортчилар ўртасидаги баҳс 2025 йил октябрь—ноябрь—декабрь ойларида бўлиб ўтиши кутилмоқда.
Эслатиб ўтамиз, 29 июнь куни Лас-Вегасда бўлиб ўтган UFC 317 мусобақасида Топурия бразилиялик Чарльз Оливейрани биринчи раундда нокаутга учратиб, ғалаба қозонган эди. Шу тариқа у UFC енгил вазн тоифасининг янги чемпионига айланди ва промоушен тарихида икки вазн тоифасида чемпионлик камарини қўлга киритган ўнинчи жангчи сифатида тарихга кирди.
Изоҳ (0)