Комик жанрнинг энг ёрқин актёрларидан бири бўлган Робин Уильямс бир кадрда ҳам кулгили, ҳам қайғули ҳолатларни моҳирона акс эттира оларди. Актёр ҳаёт бўлганида, бу йил 74 ёшни қаршиларди. У унутилмас образларидан ташқари, бутун умри давомида меҳрибон инсон ролини ижро этди.
Робин Уильямс Стивен Спилбергни депрессиядан қутқариб қолган
“Ўзга сайёралик” фильми ижодкори Стивен Спилберг ҳаётининг энг сермаҳсул даврларидан бирида жуда ҳолдан тояди. Режиссёр бир вақтнинг ўзида “Юра даври парки” ва “Шиндлер рўйхати” фильмлари устида ишлашга киришади. Бу фильмлар бир-бирига қарама-қарши бўлиб, Спилберг улардан бирини соф инсоний туйғулар билан, иккинчисини эса кинокомпания талаби билан суратга олмоқчи эди. Режиссёр Ҳолокост ҳақидаги жуда шахсий ва оғриқли ҳикоя ҳамда тиранозаврнинг жипни қувиши ўртасида иккиланиб қолади.
Ўшанда Спилберг “Шиндлер рўйхати”ни Ҳолокост шахсий тарихига айланган бошқа режиссёр — онаси Освенсимда ҳалок бўлган ва ўзи болалигида Краков геттосидан мўжизавий тарзда омон қолган Роман Поланскига топширишни ўйлайди. Бироқ Полански ўша пайтда Иккинчи жаҳон уруши мавзусига яқинлашишга тайёр эмасди. Спилберг иккита оғир лойиҳа билан ёлғиз қолади ва унинг руҳий ҳолати издан чиқади.
Спилберг Робин Уильямс билан анча олдин, уни “Капитан Ҳук” фильмида суратга тушишдан аввал танишганди. Режиссёр ва актёр тез орада қалин дўст бўлиб қолишади. Уильямс Спилбергнинг оғир аҳволини билиб, қўлидан келадиган ишни қилади: дўстини кулдиради.
“Робин менинг ташвишда эканлигимни биларди ва ҳар ҳафта белгиланган вақтда қўнғироқ қилиб, телефон орқали 15 дақиқалик ҳазил-ҳузул қиларди. Мен қотиб-қотиб кулардим, ҳис-туйғуларни чиқариб юборардим. Мен баланд овозда кулаётганимда Робин доим гўшакни қўйиб қўярди. У ҳеч қачон хайрлашмасди, шунчаки мен қаҳ-қаҳ уриб кулганимда гўшакни қўярди”, деб эслайди Стивен Спилберг.
Робин Уильямс Коко лақабли гориллани ҳам кудирган
Коко лақабли горилла ноёб тур бўлган. Олимларнинг таъкидлашича, у инглиз имо-ишора тилини ўзлаштирган ва Санта Крус қўриқхонасидаги назоратчилар билан мулоқот қила оларди. Уни гўдаклигиданоқ имо-ишорага ўргатишган ва ҳайвон чинакам юлдузга, табиат ва инсон ўртасидаги кўприкка айланганди.
Робин Уильямс горилланинг ҳаётидаги энг қийин даврда унинг олдига таклиф этилади. Коко узоқ вақт давомида шериги Майкл билан яшаган, у ўлгач тушкунликка тушиб қолганди. Горилла ўзини ёмон ҳис қилаётгани ва зерикаётганини имо-ишоралар билан кўрсатиб, овқатдан бош тортарди. Коконинг тушкунлик ҳолати тахминан олти ой давом этгач, 2001 йилда назоратчилар Робин Уильямсдан уни кулдириш учун ёрдам сўрашади.
Актёр ва горилла ўртасидаги мулоқот жуда табиий тарзда кечади. Горилла стулда ўтирган Уильямснинг ёнига келиб, ерга ўтиради-да, унинг қўлидан ушлаб, ёнига таклиф этади. Сўнгра актёрнинг кўзойнагини олиб, тақиб кўради, кейин эса кўзойнакни Уильямсга қайтариб беради. Коко Робинга ўрганиб қолгач, унга ўйин таклиф қилади: улар бир-бирини қитиқлайди, актёр маймун олдида турли-туман юз ифодаларини кўрсатади ва иккаласи ҳам қотиб-қотиб кулишади.
“Биз бир-биримиз билан ғайриоддий нарсани — кулгини баҳам кўрдик. Коко инглиз тилини тушунади ва мингдан ортиқ ишораларни билади. Улар ёрдамида мулоқот қилади ҳамда одамлар билан кундалик воқеалар, ҳаёт, муҳаббат ва ҳатто ўлим ҳақидаги фикрлари ва кечинмаларини ўртоқлашади. Бу учрашув ҳақиқатан ҳам унутилмас бўлди”, деган Робин Уильямс бу ғайриоддий тажриба ҳақида.
2014 йилда Коко актёр вафот этгани ҳақида ходимларнинг суҳбатини эшитиб қолади. У жуда хафа бўлиб, ўзини назарда тутган ҳолда “аёл йиғлаяпти” деган ишорани кўрсатади.
Робин Уильямс Disneyʼга шарт қўйган
Робин Уильямсга Disneyʼнинг “Оловуддин” мультфильмида Жинга овоз беришни таклиф қилганларида, у дастлаб иккиланади. Чунки студия ҳар қандай имкониятдан фойдаланиб пул топишини биларди. Бироқ кейинчалик актёр ўз шартлари асосида бу персонажга овоз беришга рози бўлади.
Уильямс таклиф этилган 8 миллион доллар ўрнига 75 минг долларга рози бўлади. Бу пулни у АҚШ кино актёрлари гилдиясига беришга қарор қилади. Фақат бир шарт билан — Disney кейинчалик Уильямснинг овози ва қиёфасидан бошқа рекламаларида фойдаланмасликка рози бўлса. Бироқ компания бошқача йўл тутади: у фастфуд ва ўйинчоқлар рекламасида Уильямснинг овозидан яширинча фойдаланади.
“Мен фақат овоз беришга розилик билдирдим, холос. Буни улкан анимациянинг бир қисми бўлишни хоҳлаганим учун қиляпман. Фарзандларимга нимадир қолдирмоқчиман. Лекин битта шартим бор: ҳеч нарса сотишни истамайман”, деган актёр қатъий оҳангда.
Натижада Уильямс ўз исми, имзоси ва суратидан фойдаланиш ҳуқуқини хайрия ташкилотига топширади. Шу йўл билан у вафотидан сўнг 25 йил давомида ўзи иштирок этган ҳеч қандай реклама пайдо бўлмаслигини таъминлайди.
Робин Уильямс Суперменга ёрдам берган
Узоқ вақт давомида кинонинг асосий Супермени актёр Кристофер Рив бўлган. У камерадан ташқарида ҳам суперқаҳрамонга ўхшарди: фильмга олиш пайтида трюкларни ўзи бажарарди, отда чопарди, самолётларда учарди, яхта бошқарарди, хайрия ишлари билан фаол шуғулланарди. Кейинчалик у отдан йиқилиб, бўйин умуртқаларини синдириб олади. Натижада Ривнинг бўйнидан пастки қисми фалаж бўлиб қолади, афсуски, бу ҳолатни даволашнинг иложи йўқ эди.
Рив Робин Уильямс билан актёрлик мактабидан бери дўст эди. Даҳшатли ҳодиса уларнинг дўстлигини янада мустаҳкамлайди. Ривнинг эслашича, касалхонага уни биринчи бўлиб Уильямс кўргани келган. У шифокор кийимини кийиб, ғалати русча талаффуз билан гапирган ва ўзини проктолог деб таништирган. Сўнг ҳазиллар айтиб, охир-оқибат дўстини кулдирган.
“Мен ҳақиқатан ҳам қийин аҳволга тушганимда Виржинияга биринчи бўлиб у келди. Худога шукрки, ўша пайтда бу креслода хавфсизлик камарини тақиб олган эдим, акс ҳолда унинг қилиқларидан кулиб йиқилиб тушган бўлардим. Бундай фожиа пайтида ҳам... чинакам қувонч, кулги ва севгини ҳис қилиш мумкин экан”, деб эслайди Рив.
Робин Уильямс Кристофер Ривга ҳаётга бўлган иштиёқини йўқотмасликка ёрдам берди ва дўстининг барча ташаббуслари-ю интилишларини қўллаб-қувватлади.
Изоҳ (0)