Озарбайжоннинг AZAL авиакомпаниясига тегишли йўловчи самолётини нишонга олиш буйруғи Россиянинг 51-ҳаво мудофаа дивизияси командири, генерал майор Александр Толопило томонидан берилган. Бу ҳақда россиялик подполковникнинг кўрсатмасига таяниб Minval нашри хабар берди.
Ички тергов давомида дивизиянинг навбатчи зобити, подполковник Николай Орлянский шундай баёнот берган. У Толопилодан буйруқ олганидан сўнг, капитан Паладичукка “аниқланмаган ҳаво нишонини йўқ қилиш” ҳақида кўрсатма берган. Бироқ кейинчалик бу нишон фуқаролик самолёти экани аниқланган.
Minval таҳририятига юборилган аноним мактубга кўра, 2024 йил декабрида капитан Паладичук бошчилигидаги жанговар экипаж Толопилонинг оператив бошқаруви остида бўлган. Генерал майор Толопило воқеага бевосита алоқадор бўлишига қарамай, жиноий жавобгарликдан қутулгани айтилмоқда.
У айбни Россия Ҳаво ҳаракатини ташкил этиш ягона тизимининг Ростов маркази ходимларига юклаган ва атайлаб ёлғон кўрсатма берган, дейилади хатда.
Толопило “Панцирь-С” ҳаво мудофаа тизимидан учирилган ракеталар ўз-ўзини йўқ қилганини ва самолётга зарар етмаганини даъво қилган. Бироқ бу баёнотлар Россия Тергов қўмитасининг 505-ҳарбий тергов бўлими томонидан ўтказилган ички суриштирувда рад этилган.
Ҳаво мудофаа тизими бўлинмаси техник ва ташкилий жиҳатдан яроқсиз ҳолатда бўлган. Шу сабабли экипаж фуқаролик самолётини ўз вақтида аниқлай олмаган, дейди Minval нашри.
Шунга қарамай, генерал Толопило нафақат жазодан озод этилган, балки лавозими ошган. У Россия Шарқий ҳарбий округи ҳаво мудофаа кучларининг 11-гвардиячи армияси қўмондони ўринбосари этиб тайинланган.
Minval нашри унинг суратини ҳам эълон қилган. Суратда у ҳали полковник унвонида тасвирланган. Генерал майор унвони унга 2022 йил 17 февралда, президент Владимир Путиннинг 64-сонли фармони билан берилган.
Ўзи нима бўлганди?
2024 йил 25 декабрь куни Оқтов аэропортидан уч километр узоқликда Озарбайжоннинг Azerbaijan Airlines (AZAL) авиакомпаниясининг Embraer самолёти иштирокида фожиали авиаҳалокат юз берди. Боку—Грозний рейсини амалга ошираётган самолёт фавқулодда қўнишга уриниш чоғида ҳалокатга учради. Бортда 62 нафар йўловчи ва 5 нафар экипаж аъзоси бўлган.
38 киши ҳалок бўлган, яна 29 киши жароҳатланган. Президент Илҳом Алиевнинг таъкидлашича, лайнер радиоэлектрон кураш воситалари ёрдамида бошқарилмайдиган ҳолатга келтирилган ва кейин Россия ҳудудидан ҳужумга учраган. Учувчилар Россиянинг энг яқин аэропортларидан бирига фавқулодда қўнишни сўраган. Бироқ уларга ҳамма жойда рад жавоби берилган, шундан сўнг самолёт Каспий денгизини кесиб ўтиб, Оқтов шаҳрига қулаган.
Алиев ҳалокат учун жавобгарликни Россияга юклаб айбдорларни жазолашни талаб қилган. У, шунингдек, Москванинг самолётнинг ҳаво ҳужумидан мудофаа тизимидан ўққа тутилиши фактини қушлар билан тўқнашув ва бортдаги газ баллони портлаши ҳақидаги “бемаъни тахминлар ёрдамида яшириш”га уринишларидан ғазабланган.
Ҳалокатни тергов қилишда ICAO (Халқаро фуқаро авиацияси ташкилоти) конвенциясига мувофиқ Қозоғистон бошчилик қилмоқда. Ишда Озарбайжон, Россия мутахассислари, халқаро экспертлар ва Embraer вакиллари иштирок этмоқда. Қора қутилар олиб қўйилиб, халқаро экспертлар иштирокида расшифровка қилинмоқда.
Изоҳ (0)