Ижтимоий тармоқларда Тошкентдаги тунги клубда мижоз атайин менежер қизнинг юзига “хлопушка” отгани акс этган видео тарқалди.
Тарқалган хабарларга кўра, ҳодиса 17 июль куни содир бўлган. Тунги клубда менежер лавозимида ишлаган, 25 ёшли қиз мижоздан бар столидан “хлопушка”ни олиб қўйишни сўраган. Шу вақт мижоз унинг юзига атайин мазкур буюмни отган. Жабрланувчи воқеадан кейин айбдор ҳатто узр сўрамаганини қайд этган.
Шифокорлар кўз олмоси оғир даражали контузияси, юқори қовоқ, бурун юзаси ва пешона соҳаси юмшоқ тўқималари шилинган жароҳати ташхисини қўйган, тикланиш олти ойгача давом этиши мумкин. Қиз ҳуқуқни муҳофаза қилиш органларига ариза билан мурожаат қилган.
Аёллар ҳуқуқи фаоли Камола Алиева ҳам бу ҳақда ўз ижтимоий тармоқлардаги саҳифасида ёзди. Унга кўра, кафе маъмурияти жабрланувчига ҳеч қандай ёрдам бермаяпти. Чунки мижоз бир келган вақтида кафега 20-30 млн сўм тўлаб кетади.
Февраль ойида Фарғонада компьютер клубида жанжал кўтарган шахслар қамоққа олинган эди. 21 февраль куни Фарғона шаҳар Офтоб кўчасида жойлашган компьютер ўйинлари клубида етти нафар танишлар ўзаро бақир-чақир қилиб компьютер ўйнагани учун клуб иш бошқарувчиси Ф.Худойназаров томонидан уларга эътироз билдирилган. Натижада ўзаро келишмовчилик сабабли фуқаро О.Валломов уни калтаклаган, жанжалга унинг шериклари ҳам қўшилган.
Ўзбекистонда 2024 йилда 469 568 киши маъмурий жавобгарликка тортилган. Кўрилган маъмурий ҳуқуқбузарлик тўғрисидаги ишларнинг аксариятини майда безорилик каби ҳуқуқбузарликлар бўлган. 2024 йилда жиноят ишлари бўйича судлар томонидан 77 995 нафар шахсга нисбатан 61 481 та жиноят иши кўриб чиқилган. Судланганлар сони 61 502 нафарни ташкил этиб, шундан 20 659 кишига озодликдан маҳрум қилиш ва 39 763 нафарига бошқа турдаги жазолар тайинланган, 1 080 нафар шахс шартли ҳукм қилинган.
Изоҳ (0)